«Մամուլի հետ սուրճ» հաղորդման հոկտեմբերի 15-ի հյուրը «Երկիր մեդիա» հեռուստաընկերության «Երկրի հարցը» հաղորդաշարի հեղինակ և վարող Դավիթ Սարգսյանն է։
Խոսելով վարչապետ Նիկոլ Փաշինյանի սպասվելիք հրաժարականի մասին՝ Դավիթ Սարգսյանն ասաց, որ շոշափելի վտանգ չկա, որ խորհրդարանական որևէ խմբակցություն կարող է ինչ-որ նախաձեռնությամբ հանդես գալ: «Միայն մի տարբերակ է մնում, որ վարչապետի հրաժարականից հետո կայուն մեծամասնություն ձևավորելու համար երկու խմբակցություն կարող են կոալիցիա կազմել։ «Ծառուկյան» դաշինքի հետ հուշագիր է կնքված, ընդ որում՝ դա ավելի շատ միակողմանի պարտավորություններ է ենթադրում։ ՀՀԿ-ից մոտ երկու տասնյակ պատգամավոր արդեն իսկ իր համերաշխությունն է հայտնել։ Այնպես որ, այս պահին ռեալ վտանգ չկա»,- ասաց նա։
Մեր զրուցակիցը հավելում է. «Ես չեմ պատկերացնում մի սցենար, երբ Նիկոլ Փաշինյանի կողմից նշանակված ուժային կառույցների ղեկավարները կարող են դրա դեմ սաբոտաժ անել»։