Հայ ազգային կոնգրեսի համակարգող Լևոն Զուրաբյանից այսօր լրագրողները փորձեցին ճշտել, թե ինչո՞ւ է Կոնգրեսի համակարգողը խոսում համակարգային փոփոխությունների անհրաժեշտության մասին, մինչդեռ նախկինում կարևորվում էին արտահերթ ընտրությունները:
Լ.Զուրաբյանը ճշտեց, որ այսօր իր կողմից իշխանություններին ուղղված կոչերից մեկում հստակ շեշտել է. «Երկխոսության միակ արդյունքը կարող է լինել համակարգային փոփոխությունները, որոնք թույլ կտան Հայաստանում օր առաջ, ինչը նշանակում է՝ արտահերթ ընտրություններով, լեգիտիմ պետական իշխանություն ձևավորել: Ուզում եմ հիշեցնել, որ 2008 թ. օգոսոտոսից սա է եղել Կոնգրեսի նպատակը»:
Ս. Սարգսյանը երկխոսության առնչությամբ իր ելույթում կոնկրետ պաշտոնյաների էր նշել երկխոսության ֆորմատի համար։ Այսօր լրագրողները հարց ուղղեցին Կոնգրեսի համակարգողին՝ այնուամենայնիվ, ի՞նչ ֆորմատով են գնալու իշխանությունների հետ երկխոսության. «Ինչո՞ւ են իշխանությունները հատուկ շեշտում, թե բանակցությունը անընդունելի է, իսկ երկխոսությունը՝ հնարավոր, ասում են, որ երկխոսությունն ու բանակցությունը տարբեր բաներ են… Իրականում դա աբսուրդ է: Բանակցությունը ընդամենը երկխոսության ձև է: Ինչո՞ւ են բանակցություն բառից նրանք վախենում։
Որովհետև բանակցությունը մի գործընթաց է, որն ուղղված է պայմանավորվածությունների ձեռքբերմանը կամ ձախողմանը: Խուսափելով բանակցություններից՝ իշխանությունները ցույց են տալիս, որ չեն ուզում ընդգրկվել մի պրոցեսի մեջ, որի արդյունքում կլինեն պայմանավորվածություններ: Իշխանությունները ուզում են ուղղակի կազմակերպել կարծիքների փոխանակում, եթե կուզեք՝ գյալաջի: Մենք գյալաջիի ժամանակ չունենք: Մեզ հետաքրքրում են արդյունքները, համակարգային փոփոխությունները, ուստի ուղղակի գնալ և հանդիպել ինչ-որ մարդկանց հետ և նրանց հետ գյալաջի անել չենք կարող։ Վստահ եղեք, որ մենք գյալաջիի համար շատ ավելի հետաքրքիր շրջապատ կգտնեինք: Ուստի հիմա գտնվում ենք մի վիճակում, երբ մի կողմից իշխանությունները ըմբռնում են, որ երկխոսությունը կարևոր գործընթաց է, որից նրանք չեն ուզում հրաժարվել, և դա ողջունելի է, մյուս կողմից՝ նրանք խուսափում են այդ երկխոսությանը լիրաժեք բովանդակություն տալու պատրաստակամությունից: Այսինքն՝ մենք պետք է հասնենք մի պրոցեսի, որը կլինի արդյունավետ, իսկ դա լիազորված ներկայացուցիչների հանդիպումն ու բանակցություններն են»:
Լրագրողները Կոնգրեսի համակարգողին հարց ուղղեցին ՀՀ նախկին վարչապետ Հրանտ Բարգրատյանի՝ օրերս արած մի տեսակետի առիթով, թե՝ «Սերժ Սարգսյանը Կազան է գնում որպես դեմոկրատ նախագահ»: Լ.Զուրաբյանը շեշտեց. «Կոնգրեսի համար Ս. Սարգսյանը կար և մնում է մարդ, որը ընտրված չէ ժողովրդի կողմից՝ որպես ՀՀ նախագահ, որը տիրացել է իշխանության լծակներին՝ Ռ. Քոչարյանի ղեկավարած ռեժիմի կողմից կատարված ուզուրպացիայի հետևանքով՝ կեղծված ընտրություններով, Մարտի 1-ի սպանդով: Այնպես որ, այս գնահատականի մեջ Հայ ազգային կոնգրեսը որևէ փոփոխություն չունի և երբեք չի էլ ունենա»:
Իշխանություններն ի՞նչ լեզվով պետք է ասեն, որ երկխոսության չեն գնա, որպեսզի Կոնգրեսի համար դա հասկանալի լինի՝ հարցրեց լրագրողը: «Սերժ Սարգսյանի սիրած ֆուտբոլային տերմինոլոգիայի համաձայն՝ գնդակն այսօր գտնվում է մեր խաղադաշտում, և ես, լինելով «Բարսելոնա»-ի խաղի սիրահար, այն խաղաոճի կողմնակիցն եմ, որ այդ գնդակը լավ մշակվի, ապա նոր ուղարկվի հակառակորդի խաղադաշտ»,- նկատեց Լևոն Զուրաբյանը:
