«Ազատություն» ռադիոկայանի տեղեկացմամբ Երևանի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը այսօր մերժել է Ազգային ժողովի հանրապետական պատգամավոր, գործարար Տիգրան Արզաքանցյանի հայցը ընդդեմ «Իրավունք» թերթի:
Տիգրան Արզաքանցյանը իր հայցով պահանջում էր պարտավորեցնել թերթին՝ հրապարակել իր կողմից ներկայացված պատասխանը «Իրավունք»-ի այս տարվա փետրվարի 22-ի համարում տպագրված «Կլորիկ գումա՞ր է «կրվել»» խորագրով հոդվածի վերաբերյալ, «Իրավունք Մեդիա» ընկերությունից բռնագանձել 3 միլիոն դրամ (շուրջ 8 հազար դոլար)՝ որպես վիրավորանքի և զրպարտության հետևանքով իր պատվին և արժանապատվությանը պատճառած վնասի փոխհատուցման գումար, ինչպես նաև 586 հազար դրամ՝ փաստաբանական ծառայության վճարը, 68 հազար դրամ՝ որպես վճարված պետական տուրքի գումար:
Հայցը մերժվել է ամբողջությամբ՝ «անհիմն լինելու հիմքով»: Դատարանը որոշել է նաև Արզաքանցյանից բռնագանձել 10 հազար դրամ՝ որպես «գործով չվճարված պետական տուրքի գումար»:
«Սա առաջին դեպքն է, երբ դատարանը մերժում է օլիգարխի հայցն ընդդեմ լրատվամիջոցի»,- ընդգծում է «Իրավունք»-ի խմբագրությունը իր հաղորդագրությունում:
