ԱՄՆ-ում դատել են ռազմական հետախուզության նախկին ծածկագրողին՝ Սոմալիում «Ալ-Շաբաբ» ահաբեկչական ցանցին միանալու փորձի համար: Բալթիմորի դաշնային դատարանը Քրեգ Բեքսեմին դատապարտել է 7 տարվա ազատազրկման: Այս մասին գրում է ITAR-TASS-ը:
26-ամյա Բեքսեմը գործարք է կնքել արդարադատության հետ և համաձայնել խոստովանել իր մեղքը, ինչի դիմաց դատախազությունը նրա համար խիստ պատիժ չի պահանջել: Նրան վերագրել են միայն ապացույցների ոչնչացումը, որոնք կարող էին օգտագործված լինել հակաահաբեկչական հետաքննություն անցկացնելիս:
Աֆրիկա մեկնելուց առաջ երիտասարդը ոչնչացրել է իր համակարգիչը՝ թաքցնելու համար, որ «Ալ-Շաբաբ» ցանցի մասին տեղեկություններ է հավաքել: Բեքսեմը նաև Քենիա մեկնելու և վերադարձի ավիատոմս է գնել՝ հույս ունենալով, որ իր գործողությունները պակաս կասկածելի կլինեն:
Նա ձերբակալվել է 2011-ի դեկտեմբերին՝ Սոմալի տեղափոխվելու փորձի ժամանակ:
