Հոկտեմբերի 1-ին մահացու հրազենային վիրավորում ստացած շարքային Գևորգ Հարոյանի ծնողների պնդումները ճիշտ էին՝ իրենց որդու նկատմամբ բռնություն է եղել։ Ծնողների վարկածը հաստատեց նաև նախաքննական մարմինը։ Գևորգ Հարոյանի մահվան դեպքի առթիվ առաջին կայազորային քննչական բաժնում ՀՀ Քրեական օրենսգրքի 110-րդ հոդվածի 1-ին մասով հարուցված քրեական գործով կատարված բազմակողմանի քննության արդյունքում տվյալներ են ձեռք բերվել՝ զինվորական ծառայության պարտականությունները կատարելու կապակցությամբ կրտսեր սերժանտի կողմից Գևորգ Հարոյանի նկատմամբ բռնություն գործադրելու վերաբերյալ: Կրտսեր սերժանտին մեղադրանք է առաջադրվել՝ ՀՀ Քրեական օրենսգրքի 358.1-րդ հոդվածի 4-րդ մասով, և նրա նկատմամբ որպես խափանման միջոց է ընտրվել կալանավորումը:
Բացի դրանից՝ իշխանության անգործություն ցուցաբերելու, ինչպես նաև զինվորական ծառայության պարտականությունները կատարելու կապակցությամբ ժամկետային զինծառայող, շարքային Հարոյանին վիրավորանք հասցնելու կասկածանքով՝ ՀՀ Քրեական օրենսգրքի 375-րդ հոդվածի 1-ին մասով և ՀՀ Քրեական օրենսգրքի 360-րդ հոդվածի 2-րդ մասով ձերբակալվել է վաշտի հրամանատար կապիտանը:
Հիշեցնենք, որ հոկտեմբերի 1-ին Մարտունու զորամասերից մեկի պարտադիր ժամկետային զինծառայող, շարքային, 21-ամյա Գևորգ Հարոյանը վաշտի զինանոցում կրծքավանդակի շրջանում ստացել էր հրազենային վիրավորում և մահացել։
Ծնողները դեպքից հետո մեզ հետ զրույցում էլ պնդել էին, որ իրենց որդին ոչ մի պարագայում չէր կարող ինքնասպան լինել։ Նրանց պնդմամբ՝ Գևորգին նախ դաժանաբար ծեծել, հետո սպանել են: Մայրը որդուն դեպքից մեկ օր առաջ էր տեսակցել։ Մարտունի էր գնացել որդու կանչով։ Գնալուց նկատել էր որդու վրա կապտուկներ, սպիներ, բացի դրանից՝ որդին վախվորած էր եղել, առանց զինվորական հագուստի, առանց զինվորական կոշիկների, ընդամենը մի հին շորով՝ պատճառաբանելով, որ գողացել են իր ունեցածը։ Փաստորեն ծնողների վարկածը հիմնավորվել է, և Գևորգ Հարոյանի գործով արդեն երկու ձերբակալված անձ կա։
Գործով նախաքննությունը շարունակվում է։
