ԵՄ-ի հետ Մոլդովայի մերձեցումն ուժեղացնում է կենտրոնախույս միտումները հանրապետությունում: Քիշնևից վերջնական անջատում պահանջող Մերձդնեստրից հետո անջատողական տրամադրություններն ուժեղանում են նաև Գագաուզիայում: Ինքնավարության իշխանությունները ստեղծում են կենտրոնից անկախ դատական համակարգ և պատրաստում Մաքսային միությանն անդամակցության մասին հանրաքվե: Քիշնևում այդ ամենի հետևում տեսնում են Մոլդովայի եվրաինտեգրմանը խանգարելու Մոսկվայի փորձերը: Այս մասին հայտնում է Kommersant-ը:
ԵՄ-ի հետ Ասոցացման մասին համաձայնագրի ստորագրումից Կիևի հրաժարվելուց հետո և դեպի Մաքսային միություն Երևանի կտրուկ շրջադարձից հետո Քիշնևը դարձել է Բրյուսելի ֆավորիտը, իսկ Մոլդովան՝ «Արևելյան գործընկերության» նախագծի առանցքային երկիրը: Նրան խոստացվել է խոշոր ներդրում (300 մլն եվրո անհատույց օգնություն) և այցագրային ռեժիմի անհապաղ դադարեցում: Քիշնևն իր հերթին պետք է ստորագրի ԵՄ-ի հետ Ասոցացման համաձայնագիրը, որը նախաստորագրվել է Վիլնյուսում նոյեմբերին կայացած «Արևելյան գործընկերության» գագաթնաժողովի ժամանակ: Համարվում է, որ դա Մոլդովայի եվրաինտեգրումը անշրջելի կդարձնի:
Սակայն թե´Քիշնևում, թե´ Բրյուսելում մտավախություն ունեն, որ նախաստորագրումից ստորագրում ուղու վրա կարող են լուրջ խոչընդոտներ առաջանալ, հատկապես եթե խաղին միանա Մոսկվան: Եվրոպացի գործընկերներից հաճախ եմ SMS ստանում նախազգուշացմամբ՝ խոստովանել է Մոլդովայի արտգործնախարար Նատալյա Հերմանը:
Անցած տարի Ռուսաստանն էմբարգո է սահմանել մոլդովական գինու վրա, սակայն ցավոտ կետերի ցուցակը, որոնց կարող է սեղմել Մոսկվան, լայն է: Դրանք վերաբերում են էներգետիկային (Մոլդովան լիովին կախված է ռուսական գազից), Ռուսաստանում աշխատող մոլդովացիներին:
Մերձդնեստրի հարցերով Ռուսաստանի նախագահի հատուկ ներկայացուցիչ Դմիտրի Ռոգոզինը բացահայտ նախազգուշացրել է. դեպի Եվրոպա սլացող «Մոլդովա» գնացքը կարող է ճանապարհին մի քանի վագոն կորցնել: Նա ակնարկել է Մերձդնեստրն ու Գագաուզիան:
Մերձդնեստրը պատրաստվում է իր մոտ ռուսական օրենսդրություն ներմուծել: Այժմ Մոլդովայի իշխանությունների համար գլխացավանք է դարձել Գագաուզիան, որի իշխանությունները որոշել են փետրվարի 2-ին հանրաքվե անցկացնել, որի շնորհիվ կպարզվի՝ ավելի լավ է գնալ Մաքսային միությո՞ւն, թե՞ ԵՄ: Արդյունքները կանխատեսել դժվար չէ՝ հաշվի առնելով տարածաշրջանի ռուսամետ տրամադրությունները:
Գագաուզիայի իշխանությունների ևս մեկ քայլ է դարձել հունվարի 17-ին բոլոր մակարդակների պատգամավորների արտակարգ համագումար գումարելու որոշումը՝ քննարկելու տարածաշրջանում ստեղծված իրավիճակը: Առաջին նման համագումարը կայացել է 1989 թվականի նոյեմբերին: Դրա արդյունքն է դարձել Գագաուզիայի ինքնավարության ստեղծումը:
