Վերաքննիչ քրեական դատարանում ավարտվեց Քրիստինե Գ.-ի գործով ամբաստանյալի ու նրա շահերի պաշտպանի բերած վերաքննիչ բողոքների քննությունը:
Գեղարքունիքի մարզի ընդհանուր իրավասության դատարանը 25-ամյա Քրիստինեին մեղավոր է ճանաչել իր երկու անչափահաս երեխաներին մկնդեղ խմեցնելու, նրանց սպանելու փորձ կատարելու համար՝ ՀՀ քրեական օրենսգրքի 34-104 հոդվածի 2-րդ մասի 1-ին կետով:
Նախաքննության ընթացքում և ընդհանուր իրավասության դատարանում դատաքննության ժամանակ Քրիստինեն իրեն մեղավոր է ճանաչել:
2012 թվականի հունիսի 13-ին, ժամը 10-ի սահմաններում Քրիստինեն Վարդենիս քաղաքի անասնաբուժական-անասնաբուծական դեղորայքի առևտրի կետից ձեռք է բերել մկնասպան պատրաստուկ:
Նույն օրը՝ ժամը 13-ն անց 30-ի սահմաններում կենցաղային հարցերի պատճառով իր երկու անչափահաս որդիներին սպանելու դիտավորությամբ նա գործով վկա Օֆելյա Ս.-ի առանձնատանը մկնասպան պատրաստուկ է խմեցրել իր երեխաներին ու քնեցրել՝ նախապես ինքն էլ խմելով նույն մկնդեղից:
Քրիստինեն, բարեբախտաբար, կատարածի մասին հեռախոսով հայտնել է իր հարսին, ով անմիջապես տեղյակ է պահել տանտիրուհուն: Վերջինս ահազանգել է շտապօգնություն:
Քրիստինեին ու երեխաներին տեղափոխել են Վարդենիսի հիվանդանոց, ապա Երևան՝ համապատասխան բուժում ստանալու:
Կատարվածի հետևանքով նրանք ունեցել են սուր թունավորում մկնդեղով, երեքի առողջությանն էլ պատճառվել է միջին ծանրության վնաս՝ առողջության տևական քայքայումով:
Ընդհանուր իրավասության դատարանը Քրիստինեին դատապարտել էր 12 տարի ազատազրկման:
Նրա խափանման միջոցը փոխվել էր, ընտրվել էր կալանավորումը, և Քրիստինեին կալանքի տակ էին վերցրել դատարանի դահլիճում:
Վերաքննիչ բողոքում Քրիստինեն խնդրել էր պատժի մասով փոփոխել դատավճիռը, պայմանական դատապարտություն կիրառել իր նկատմամբ ու ազատ արձակել՝ սահմանելով փորձաշրջան կամ մեղմացնել պատիժը:
Քրիստինեի շահերի պաշտպան Ա. Սաղաթելյանը այն դիրքորոշումն էր հայտնել, որ իր պաշտպանյալի պաշտպանական իրավունքը խախտվել է, նրան չեն բացատրել անվճար պաշտպան ունենալու իրավունքը, Քրիստինեն էլ հրաժարվել է պաշտպանից, նախաքննության ընթացքում ու դատարանում՝ մինչև կողմերի վիճաբանությունների պահը, նա պաշտպան չի ունեցել:
Ըստ պաշտպանի՝ դատահոգեբուժական և դատահոգեբանական համալիր հանձնաժողովային փորձաքննության եզրակացությունը վիճելի է: Մասնագետները նշել են, թե Քրիստինեն մեղսունակ է, արարքի կատարման պահին եղել է հոգեկան լարված, բայց ոչ՝ ֆիզիոլոգիական աֆեկտի վիճակում, մինչդեռ, ըստ պաշտպանի, Քրիստինեի պատմածում ինքը աֆեկտի մեջ գտնվելու հատկանիշներ է նկատում:
Վերաքննիչ քրեական դատարանը եզրակացրեց, որ ամբաստանյալի պաշտպանական իրավունքը չի խախտվել: Փորձագիտական եզրակացությունները կասկած չեն հարուցում:
Միևնույն ժամանակ դատարանը հնարավոր համարեց մասնակիորեն բավարարել ամբաստանյալ Քրիստինեի վերաքննիչ բողոքը՝ պատիժը մեղմացնելու առումով:
Քրիստինեն մեղավոր է ճանաչվել ծանր հանցագործության համար, նրա նկատմամբ նշանակվել է տևական ազատազրկում: Վերաքննիչ քրեական դատարանը հնարավոր համարեց օրենքով սահմանվածից ավելի մեղմ պատիժ նշանակել՝ այս բացառիկ գործում առանձնացնելով բացառիկ հանգամանքներ. Քրիստինեն հանցավոր արարքը գործելուց անմիջապես հետո միջոցներ է ձեռնարկել՝ կապված երեխաների փրկության հետ, նա զգուշացրել է իր կատարածի մասին:
Հաշվի առնվեց, որ մինչև աննախադեպ հանցագործության կատարումը Քրիստինեն երկար ժամանակ եղել է հոգեճնշված վիճակում՝ կապված սոցիալական ծանր պայմանների ու ընտանեկան լարված իրավիճակի հետ: Ամուսինը պարբերաբար գնացել է արտագնա աշխատանքի: Նրա հայրն անբարյացակամ վերաբերմունք է դրսևորել Քրիստինեի նկատմամբ, կասկածի տակ դրել նրա բարոյական վարքագիծը, նվաստացրել նրան, սպառնացել է խլել երեխաներին:
Քրիստինեն «Օդնոկլասնիկի» կայքի միջոցով կապի մեջ է մտել անծանոթ տղամարդկանց հետ, ինչը հայտնի է դարձել նրա ամուսնուն ու առաջացրել Քրիստինեի վախը:
Ստեղծված իրավիճակում Քրիստինեն նախ երեխաների հետ փախել է վարձակալած բնակարանից, օթևանել հոր ընկերոջ տանը, բայց ավելի ու ավելի ճնշված վիճակի մեջ ընկնելով՝ որոշել է վերջ դնել իր, ապա և երեխաների կյանքին:
Քրեական գործով հաստատվել է, որ Քրիստինեն նախ ինքն է խմել մկնդեղը, քսան րոպե անցնելուց հետո, մտածելով, թե երեխաներն անտեր կմնան, մկնդեղ է խմեցրել նաև նրանց: Եվ անմիջապես բարեկամուհուն հաղորդել է իր կատարածի մասին:
Ըստ փորձագիտական եզրակացության՝ հանցանքի կատարման պահին Քրիստինեն գտնվել է հիվանդագին ժամանակավոր խանգարման վիճակում՝ «ռեակտիվ դեպրեսիվ խանգարում՝ սուիցիդալ փորձով»:
Վերաքննիչ դատարանը քրեական օրենսգրքի 64 հոդվածի կիրառմամբ 104 հոդվածի 2-րդ մասի սանկցիայով նախատեսված պատժի նվազագույն չափից ավելի մեղմ պատիժ սահմանեց Քրիստինեի նկատմամբ՝ պատժի մասով բեկանելով ընդհանուր իրավասության դատարանի դատավճիռը, որով Քրիստինեն դատապարտվել էր 12 տարի ազատազրկման:
12-ամյա ազատազրկման փոխարեն վերաքննիչ դատարանը, Քրիստինեին մեղավոր ճանաչելով ՀՀ քրեական օրենսգրքի 34-104 հոդվածի 2-րդ մասի 1-ին կետով և 64 հոդվածի կիրառմամբ, նրան դատապարտեց… 3 տարի ազատազրկման:
Այս ամսվա վերջին քաղաքացիական դատավարության կարգով քննվելու է Քրիստինեի ամուսնու հայցը՝ Քրիստինեին մայրական իրավունքներից զրկելու վերաբերյալ: Երկու երեխաները գտնվում են հոր խնամքի տակ:
