Արքայադուստր Եվգենիան և Ջեք Բրուքսբենքը կամուսնանան հոկտեմբերի 12-ին։
Այդ իրադարձությանը պատրաստվում են ոչ միայն երիտասարդ զույգը, այլև Մեծ Բրիտանիայի սովորական քաղաքացիները. չէ՞ որ ավանդույթի համաձայն արարողության ծախսերի մի մասը հենց իրենք են վճարում։ Պետական գանձարանից է վճարվում հյուրերի և ապագա ամուսինների անվտանգությունն ապահովելու գումարները, իսկ դա ամենածախսատար հոդվածն է։ Օրինակ, արքայազն Հարիի և Մեգան Մարքլի հարսանիքը պետության վրա 45 միլիոն դոլար է նստել, որից 40-ը հենց անվտանգության վրա է ծախսվել։ Mirror պարբերականի տվյալներով՝ արքայադուստր Եվգենիայի հարսանիքի անվտանգության ծախսերը մոտ 2,5 միլիոն դոլար են կազմելու։ Բրիտանական խորհրդարանի անդամները հանդես են գալիս ըննդեմ այս ծախսերի՝ դրանք «չափազանց» մեծ անվանելով։ Նրանց աջակցում են նաև շարքային քաղաքացիները, որոնք վերջերս ստորագրահավաք էին կազմակերպել՝ պահանջելով, որպեսզի թագավորական ընտանիքը ամբողջությամբ իր վրա վերցնի հարսանիքի ծախսերը։
Հարկատուները կառավարությանը կոչ են անում «հաշվետվություն հրապարակել հարկերի վճարներից գոյացած բոլոր ծախսերի վերաբերյալ»։
