Այսօր Երևանում մենկնարկեց «ԴիջիԹեք Բիզնես ֆորում 2011» ցուցահանդեսը, որտեղ տեղեկատվական տեխնոլոգիաների ոլորտում գործող մի շարք ընկերություններ ներկայացնում են իրենց բիզնես լուծումները։ Սա թվով 4-րդ ֆորումն է, որ շարունակվելու է նաև վաղը։ Ֆորումի բացման ժամանակ ելույթ ունեցավ նաև ՀՀ վարչապետ Տիգրան Սարգսյանը։
«Մենք կարևորում ենք այս ֆորումը, որովհետև սա մի հարթակ է, որ հնարավորություն է տալիս կառավարությանը, շփվելով ոլորտի ներկայացուցիչների հետ, հասկանալ՝ որոնք են այս ոլորտի առաջնահերթությունները և ինչ խնդիրներ մենք պետք է լուծենք։ Այս ֆորումի առանձնահատկությունն այն է, որ մենք առարկայորեն տեսնում ենք, թե մեր ընկերությունները ինչ նվաճումներ ունեն և ինչ նոր առաջարկներ են ներկայացնում հաճախորդներին։ «ՏՏ ոլորտը, եթե գնահատենք վերջին 3 տարիների զարգացման տեմպերով, զբաղեցնում է մեր տնտեսության մեջ առաջատարի դիրքը»,- հայտարարեց Տիգրան սարգսյանը՝ նշելով ոլորտի վերաբերյալ մի շարք ցուցանիշներ։
«2009 թվականը մենք ավարտել ենք՝ ունենալով բջջային հեռախոսով ինտերնետից օգտվող 1.1 մլն բաժանորդներ, 2010 թվականը՝ ավարտել ենք 1 մլն 343 հազար բաժանորդով, իսկ 2011 թ. առաջին եռամսյակը ավարտել ենք՝ ունենալով 1.7 մլն բաժանորդ։ Եթե վերցնենք լայնաշերտ ինտերնետի հասանելիությունը, ցուցանիշները հետևյալներն են։ 2009 թ. մենք ավարտել ենք՝ ունենալով 70 հազար բաժանորդ, 2010 թ. ավարտել ենք՝ ունենալով 170 հազար բաժանորդ, 2011 թ. առաջին եռամսյակում արդեն իսկ ունենք 240 հազար բաժանորդ։ Կարևոր է, որ բաժանորդների քանակի աճն ուղեկցվում է գների նվազմամբ։ Եթե վերցնենք լայնաշերտ ծառայությունների միջինացված գները՝ մինչև 1 Mb/վայրկյանում գինը, 2009 թ. ավարտել ենք 234 հազար դրամ գնով, 2010 թ.՝ 71 հազար դրամ, իսկ 2011 թ. առաջին եռամսյակն ավարտել ենք 55 հազար դրամ գնով»,- նշեց վարչապետը։
