Սեպտեմբերի 21-ից 22-ը Ռումինիայում ՀՀ դեսպան Սերգեյ Մինասյանն այցելել է Ռումինիայի՝ բնակչությամբ երրորդը հանդիսացող Տիմիշոարա քաղաք՝ մասնակցելու Հայաստանի Հանրապետության անկախության օրվան նվիրված համերգին, որը կազմակերպվել էր Տիմիշոարայի ֆիլհարմոնիայում՝ գլխավոր տնօրեն Իոան Կորիոլան Գարբոնիի նախաձեռնությամբ:
Ինչպես տեղեկացրին ՀՀ ԱԳՆ լրատվության և հանրային դիվանագիտության վարչությունից, համերգի բացմանը դեսպան Մինասյանը հանդես է եկել ողջույնի խոսքով: Համերգի ընթացքում հնչել են Արամ Խաչատրյանի ստեղծագործությունները՝ Գաբրիել Վոյկու Անտոնյանի դիրիժորության ներքո:
Նույն օրը տեղի է ունեցել դեսպանի հանդիպումը Տիմիշոարայի քաղաքապետ պրոֆեսոր Նիկոլաե Ռոբուի հետ: Հանդիպման ընթացքում քննարվել են Ռումինիայի և Հայաստանի մարզերի և քաղաքների միջև համագործակցության հնարավորությունները, այդ թվում նաև Տիմիշոարայի և Հայաստանի քաղաքներից մեկի հետ քույր քաղաքի կարգավիճակի հաստատման հարցը: Քննարկվել է նաև համագործակցությունը ՏՏ և թվային հարթակում ծավալելու հնարավորությունը:
Այցի ընթացքում տեղի է ունեցել հանդիպում Տիմիշոարայի արքեպիսկոպոս, Բանաթի մետրոպոլիտ Իոան Սելեժանի հետ: Հանդիպման ընթացքում անդրադարձ է կատարվել հայ և ռումին ժողովուրդների միջև պատմական լուրջ կապերի վրա խարսխված բարեկամական հարաբերություններին, ընդհանրություններին և հնարավոր համագործակցությանը մշակութային և հումանիտար ոլորտներում:
