Ադրբեջանի նախագահ Իլհամ Ալիեւն այսօր Բաքվում անցկացված մերձկասպյան երկրների երրորդ գագաթնաժողովի արդյունքներին նվիրված մամուլի ասուլիսում հայտարարել է, որ մերձկասպյան երկրների (Ռուսաստան, Ադրբեջան, Իրան, Ղազախստան, Թուրքմենստան) ղեկավարները որոշում են ընդունել Կասպից ծովի վրա ազգային գոտիները համաձայնեցնելու վերաբերյալ: Ըստ ադրբեջանական գործակալությունների` Ալիեւն ասել է. «Մենք (մերձկասպյան երկրների նախագահները) որոշում ենք ընդունել նախանշված կարճ ժամկետներում քննարկել եւ համաձայնեցնել ծովի վրա յուրաքանչյուր երկրի ազգային գոտին»:
Կասպից ծովի իրավական կարգավիճակի որոշման մասին հարցը ծագել է ԽՍՀՄ փլուզումից հետո: Մինչեւ 1991 թ. այդ կարգավիճակը որոշված է եղել առափնյա պետությունների` Իրանի եւ ԽՍՀՄ-ի միջեւ կնքված պայմանագրերով: Կասպից ծովի կարգավիճակը կարգավորվել է Խորհրդային Միության եւ Իրանի միջեւ 1921 եւ 1940 թթ-երին ստորագրված պայմանագրերով: Նոր իրավական կարգավիճակ որոշելու վերաբերյալ բանակցային գործընթացը շարունակվում է մինչ այժմ:
Ռուսաստանը, Ադրբեջանը եւ Ղազախստանն առաջարկում են ծովի հյուսիսային մասի նոր կարգավիճակը որոշել նրա հատակի սահմանազատման միջոցով, սակայն այս դեպքում բաց է մնում նրա ջրատարածության օգտագործման հարցը: Իրանն իր հերթին առաջարկում է ծովը բաժանել 5 հավասար մասերի` առափնյա պետություններից յուրաքանաչյուրին հատկացնելով ծովի մակերեւույթի 20 տոկոսը, ինչին դեմ է հանդես գալիս, մասնավորապես, Ադրբեջանը:
