Ավստրալացի սպառողներն անցած տարի համացանցով կատարել են ընդհանուր 15 միլիարդ ավստրալական դոլարի (13.5 մլրդ ԱՄՆ դոլար) գնումներ: Այլ կերպ ասած՝ յուրաքանչյուր միջին վիճակագրական ավստրալացի առցանց ռեժիմով ձեռք է բերել ավելի քան 600 դոլարի ապրանք: ITAR-TASS-ի փոխանցմամբ՝ այս մասին ասվում է երկրի առաջատար բանկերից մեկի՝ Ազգային ավստրալական բանկի նոր հետազոտությունում:
Ինչպես հայտնել է բանկի գլխավոր տնտեսագետ Ալան Օսթերը, առցանց առևտրի մասնաբաժինը ներկայում կազմում է երկրի ողջ մանրածախ առևտրի ծավալի 6.4 տոկոսը: Փորձագետը նշել է նաև, որ կանաչ մայրցամաքի բնակիչներն առցանց գնումների ավելի քան 70 տոկոսը կատարել են ավստրալական առցանց խանութներից՝ չնայած այն բանին, որ 1000 դոլարից ցածր արժեքով ապրանքներն օտարերկրյա առցանց խանութներում չունեն 11 տոկոսանոց սպառողական հարկ:
Անցած տարի ավստրալական առցանց առևտրի ծավալի աճը կազմել է մոտ 10 տոկոս, մինչդեռ նախորդ տարիներին դիտվել է ավելի ակտիվ՝ մոտ 20 տոկոսանոց աճ:
