Հայաստանը մոտենում է ընտրական բուռն շրջանի: Երևանի արտահերթ ընտրությանը կարճ ժամանակ անց կհաջորդի համապետական արտահերթ ընտրության գործընթացը: Այստեղ իրավապահ համակարգի դերը չափազանց մեծ է, քանի որ գործնականում այդ համակարգը պետք է ապահովի ընտրության օրինական և ազատ մրցակցային ընթացք՝ թույլ չտալով, որպեսզի գործի դրվեն թաղային կամ փողային մեխանիզմները: Այդ իմաստով, իրավապահ համակարգի աշխատանքում տրամադրությունների և սպասումների ոչ նպաստավոր մթնոլորտ ձևավորելը, որը նկատելի է վերջին շրջանում, դառնում է կարևոր խնդիր այն ուժերի համար, որոնք առաջիկա ընտրական գործընթացում կարող են ապավինել միայն թաղային և փողային գործիքներին: Այդ միտումների ֆոնին ուշագրավ էր ԱԱԾ պետ Արթուր Վանեցյանի հայտարարությունը, որ կառույցը աշխատելու է հնարավորինս լուռ, իսկ ինքն էլ սկսելու է աստիճանաբար զերծ մնալ լրագրողների հետ շփումներից, քանի որ դա է պահանջում աշխատանքի արդյունավետությունը: Ըստ ամենայնի՝ Հայաստանի քաղաքական նոր իշխանությունն իսկապես սկսել է իրավապահ համակարգի վերադասավորումների և, այսպես ասած, մոբիլիզացիայի գործընթաց, ինչը լիովին հասկանալի է ներկայիս իրողությունների և առկա մարտահրավերների տեսանկյունից:
Թեմայի շուրջ «Առաջին լրատվական»- ի հետ քննարկմանը մասնակցեցին Արդարադատության նախարարի առաջին տեղակալ Արթուր Հովհաննիսյանը, Իրազեկ քաղաքացիների միավորում ՀԿ նախագահ, «Իրավունքի Եվրոպա» կազմակերպության փաստաբան Տիգրան Եգորյանը:
ԱԺ արտահերթ նիստում այսօր քննարկվել է «Հայաստանի Հանրապետության քրեական օրենսգրքում փոփոխություններ և լրացումներ կատարելու մասին», «Հայաստանի Հանրապետության քրեական դատավարության օրենսգրքում լրացում կատարելու մասին», «Վարչական իրավախախտումների վերաբերյալ Հայաստանի Հանրապետության օրենսգրքում փոփոխություններ և լրացումներ կատարելու մասին» օրենսդրական նախագծերի փաթեթը: Այս փաթեթով նախատեսվում է քրեականացնել ընտրակաշառք տալը կամ վերցնելը:
«Մենք ուզում ենք հստակ մեխանիզմներ և խաղի կանոններ սահմանել և՛ ընտրողների, և՛ ընտրվողների, նաև ընտրությունները կազմակերպողների և վերահսկողների համար,- նշեց Արթուր Հովհաննիսյանը: -ԸՕ-ով նախատեսված պարտավորությունների խախտման դեպքում պետք է վրա հասնի համապատասխան պատասխանատվության միջոցը, մենք պատասխանատվության միջոցի դաշտն էինք ընդլայնում, հստակեցնում, խստացնում»:
Երևանի ավագանու ընտրություններից առաջ խաղի կանոնները չեն փոխվում. Դանիել Իոաննիսյանի դիտարկմամբ՝ Ընտրական օրենսգիրքը լի է «ստորջրյա քարերով» և ոչ միայն, և նախատեսված փոփոխությունները անհրաժեշտ են ժողովրդավարական ընտրություններ կազմակերպելու համար: Նրա խոսքով՝ ընտրակաշառքը և բարեգործությունը հստակ տարբերվում են՝ ընտրակաշառքի պարագայում ակնկալվում է քվե, իսկ բարեգործության դիմաց ոչինչ չի ակնկալվում:
Տ. Եգորյանի դիտարկմամբ՝ ընտրակեղծարարության քրեականացումը՝ «վհուկների որս» չէ: «Կարևոր փաստ է այն, որ պետությունը՝ Հայաստանի Հանրապետությունը, առաջին անգամ շատ լուրջ քրեական քաղաքականության քայլէ անում ընտրական իրավունքի պաշտպանության ոլորտում. սա ամենակարևոր ուղերձն է, որ պետք է ընկալի հանրությունը՝ այդ թվում նաև «վհուկները»»,- ընդգծեց փաստաբանը:
Մանրամասն՝ տեսանյութում: