ԱԺ պաշտպանության և ներքին գործերի, ազգային անվտանգության մշտական հանձնաժողովի նախագահ, ՀՅԴ ադամ Հրայր Կարապետյանը, այսօր լրագրողների հետ հանդիպման ժամանակ անդրադառնալով ԵԽԽՎ-ում Սերժ Սարգսյանի երեկվա ելույթին, նշեց, որ ինքն այդ ելույթի գնահատողը կամ չգնահատողը չէ, և կարծում է, որ սա դիվանագիտական ելույթ էր՝ ուղղված այն լսարանին, որը գտնվում էր այնտեղ: Կարապետյանի խոսքերով, Սերժ Սարգսյանի ելույթը՝ կապված ԵԽԽՎ-ում ԼՂՀ հարցով ենթահանձնաժողովի աշխատանքներին բավականին համոզիչ էր և հստակ ընդգծում էր, որ այդ ենթահանձնաժողովի ստեղծման շարժառիթները բացարձակապես հասկանալի չէին:
Կարապետյանը, խոսելով ԼՂՀ ՀՅԴ Կենտրոնական կոմիտեի երեկվա տարածած հայտարարության մասին, նշեց, որ դա Դաշնակցության դիրքորոշումն է ԼՂՀ խնդրի կարգավորման վերաբերյալ: «Մենք համարում ենք, որ այսօր խոսել տարածքների զիջման մասին միամտություն է, որովհետև կյանքը ցույց է տալիս, որ յուրաքանչյուր նման հնարավորություն Ադրբեջնանն օգտագործում է էլ ավելի սաստկացնելու իր ռազմական հայտարարությունները: Նման զիջումը ավելի է մեծացնում ռազմական գործողությունների հավանականությունը, և դա ԼՂՀ անվտանգության համար վտանգավոր կլինի»:
Կարապետյանն ընդգծեց, որ առանց ԼՂՀ մասնակցության որևէ հարց չի կարող լուծվել. և՛ հանրապետության նախագահը, և՛ մեր դիվանագիտական կորպուսը պետք է այդ հարցն անընդհատ բարձրացնեն: Հրայր Կարապետյանը կազանյան հանդիպումից որևէ ակնկալիք չունի, քանզի, նրա կարծիքով, Ադրբեջանը պատրաստ չէ գնալ կոմպրոմիսի: