«Երկխոսության վերաբերյալ մեր արձագանքը, ինչպես մի քանի օր առաջ նշել էինք Կոնգրեսի հաղորդագրության մեջ, կլինի, երբ մենք այդ հարցը կքննարկենք մեր համապատասխան կառույցներում»,- անդրադառնալով «Օրինաց երկիր» կուսակցության հայտնած պատրաստականությանը՝ Հայ ազգային կոնգրեսի հետ գնալ քննարկումների, «Երկիր»-ին ասել Է ՀԱԿ մամուլի խոսնակ Արման Մուսինյանը:
Թերթի հարցին՝ արդյոք դա նշանակում է, որ ՀԱԿ-ում դեռ որևէ քննարկում չի եղել, Մուսինյանը պատասխանել է «Ես չասացի՝ չի եղել: Երբ քննարկումները կարվեն, մենք մեր արձագանքը կտանք»:
Թերթը նշում է, որ «Ազատություն» ռադիոկայանի հետ զրույցում «Օրինաց երկիր»-ի փոխնախագահ և խորհրդարանական խմբակցության ղեկավար Հեղինե Բիշարյանն ասել է, որ կոալիցիոն կուսակցությունը պատրաստ է այդպիսի ձևաչափ ընտրել և սեղանի շուրջ քննարկումներ կատարել: «Դա շատ կարևոր մոտեցում է, և «Օրինաց երկիր» կուսակցությունը խնդիր չի տեսնում սեղանի շուրջ անձերով, անհատներով հանդես գալու և քննարկումները կատարելու»,- ասել է Բիշարյանը»:
