Գլխավոր դատախազությունը մերժել է ՀՀ երկրորդ նախագահ Ռոբերտ Քոչարյանի խափանման միջոցը փոխելու վերաբերյալ Ազգային ժողովի պատգամավորների միջնորդությունը: Վաղը Վերաքննիչ դատարանը կքննարկի փաստաբանների բողոքը:
Թեմայի շուրջ «Առաջին լրատվական»- ի հետ զրույցում ԱԺ «Ելք» խմբակցության պատգամավոր Արամ Զ. Սարգսյանը նշեց. «Նախ անդրադառնամ իրավական հարթությանը. մինչև հիմա ասում էին, որ նախընտրում են խափանման միջոց կալանքը, քանի որ հակառակ դեպքում մեղադրյալը կարող է խոչընդոտել քննությանը… Ես Իշխանության մեջ եղած մարդ եմ և գիտեմ, թե իշխանությունը ինչ լծակների և ինչ ինֆորմացիաների է տիրապետում, իսկ ճանաչելով Ռ. Քոչարյանին՝ կարող եմ ասել, որ ինքը միանշանակ կօգտվի դրանից: Եվ այդ առումով խափանման միջոց կալանքը համարում եմ ճիշտ:
Մնացած պրոցեսի արդյունքները ցույց կտա դատական գործընթացը, դատարանը: Ես դատավոր չեմ, ես ընկածին չեմ խփում, բայց ուզում եմ ուղիղ մի բան ասել, ինչը վերաբերում է հոգեբանական իրավիճակին: Ռոբերտ Քոչարյանն իր ամբողջ կյանքում պնդում էր, որ ինքը այս երկրի միակ տղամարդն է: Նրա վերջին հարցազրույցը նայելիս ես նույնիսկ տխրեցի՝ ես այս մարդու դե՞մ եմ պայքարել այսքան տարի: Դա «միակ տղամարդու» պահվա՞ծք էր: Շատ հանգիստ կարող էր ասել, որ ինչի մեջ մեղադրում եք, ի՞նչ գործ ունեք Խաչատուրովի, Միքայել Հարությունյանի կամ Արմեն Գևորգյանի հետ, իրենք ո՞վ էին, որ իմ հրամանը չկատարեին, ես եմ Գերագույն-գլխավոր հարամանատար եղել, ես պահել եմ սահմանադրական կարգը և դրա պատասխանը կտամ դատարանում, իրենց թողեք, ես բոլոր հարցերին պատասխան կտամ: Այ դա կլիներ «միակ տղամարդու» պատասխան: Թե չէ ասաց՝ ես տեղյակ չեմ, Մ. Հարությունյանը 4 օր հետո է ասել, ԵԿՄ-ի համար եմ արել… Թե՛ բարոյական, թե՛ մարդկային առումով դա «միակ տղամարդու» կերպար չէ:
Եվ այս պարագայում թեթև փորձության ժամանակ իր ամբողջ շրջապատին փորձում է փուռը տալ, մեղքը թողնել նրանց վրա, այն դեպքում, երբ որ բոլորս գիտենք, որ ինքն է եղել հրաման տվողը, մեր ժողովրդի 99 տոկոսը կասկած չունի, որ այն տասը մարդը, որ Մարտի 1-ին սպանվել է, Ռոբերտ Քոչարյանի հրամանով է սպանվել, ինքն է եղել կրակելու հրաման տվողը: Միքայել Հարությունյանը քաղաքական մարդ չէր, ոչ էլ քաղաքական որոշում կայացնող, ոչ էլ այդպիսի հրաման կտար… Այսինքն՝ Ռ. Քոչարյանն ասում է՝ այ, դրսերում ովքեր որ կաք, բոլորդ լծվե՛ք այս գործին, որ ինձ չդատեն, հակառակ դեպքում բոլորիդ անունները տալու եմ:
Իսկ մեր տղաներին բռնել են, կալանավորել են հենց իր իշխանության ժամանակ, թող բացի ցուցմունքները նայի՝ այդքանի մեջից մեկը եղե՞լ է, որ ուրիշի անունը տա, այ միակ տղամարդիկ այդ տղերքն էին: Իր պաշտոնավարման տարիներին ընդդիմություն էինք, կանչում էին ոստիկանություն ու տուններս խուզարկում, բայց ոչ մեկի անունը չէինք տալիս: Դու ի՞նչ «միակ տղամարդ», դու խեղճ կալանավոր ես, որ փորձում ես կաշիդ ազատել»:
Հարցազրույցն ամբողջությամբ՝ տեսանյութում:
