The New York Times պարբերականի հրատարակիչ Արթուր Օքս Սուլցբերգեր կրտսերը ԱՄՆ նախագահ Դոնալդ Թրամփին խնդրել է ուշադրություն դարձնել լրագրողների հասցեին իր արտահայտություններին՝ հայտարարելով, որ նրա խոսքերը «ոչ միայն վիճելի, այլև վտանգավոր են», հաղորդում է Assocaited Press-ը։
Սուլցբերգեր կրտսերը Սպիտակ տան ղեկավարի հետ հանդիպել է հուլիսի 20-ին։ Հանդիպման մանրամասները պետք է գաղտնի մնային, սակայն Թրամփն առաջինը հուլիսի 29-ին Twitter-ի իր էջում խախտեց լռությունը։
«Հանդիպման մեծ մասը նվիրեցինք կեղծ լուրերի մեծ քանակությանը, որոնք հրապարակում է մամուլը, և թե ինչպես են այդ կեղծ լուրերը «ժողովրդի թշնամի» դարձել»,-գրել է ԱՄՆ առաջնորդը։
Սուլցբերգեր կրտսերը պնդում է, որ հանդիպման նպատակը «նախագահի խորապես հիասթափեցնող ԶԼՄ-ների դեմ հռետորաբանությունը քննարկելն էր»։
«Ես նախագահին ուղիղ ասացի, որ իմ կարծիքով նրա խոսքերը ոչ միայն վիճելի, այլև վտանգավոր են։ Ես գիտեմ, որ նա լրագրողներին «ժողովրդի թշնամի» է անվանում, ես զգուշացրել եմ նրան, որ այդպիսի սադրիչ հնչերանգը լրագրողների հասցեին սպառնալիքների է հանգեցնում»,-ասել է հրատարակիչը։
