Քաղաքացիական պայմանագիրը դեռ որոշում չի կայացրել Երևանի ավագանու ընտրություններին մասնակցելու ձևաչափի մասին, սակայն կուսակցության ներսում արդեն մեկնարկել է քաղաքապետի չորս հնարավոր թեկնածուների ծրագրերի քննարկումը։ Ակնհայտ է՝ անկախ այն հանգամանքից՝ ՔՊ-ն առանձին, թե «Ելք»-ով կմասնակցի ընտրություններին, հենց այս կուսակցության թեկնածուն է լինելու ցուցակի առաջին համարը։ Փրայմերիզի գաղափարը լավն է. հանրությանը հայտնի են ՔՊ-ի չորս թեկնածուները, որոնք կուսակցության ղեկավար մարմնին ներկայացնում են իրենց ծրագրերը, ու ընտրության ինչ-որ մեխանիզմով բոլորիս համար պարզ կլինի, թե ով է ընտրություններում լինելու Փաշինյանի ցուցակի առաջին համարը և վստահաբար՝ Երևանի ապագա քաղաքապետը։ Դրական է արդեն այն հանգամանքը, որ հասարակությունը հենց սաղմնային փուլից մասնակցում է գործընթացին։
Ամբողջ խնդիրն այն է, որ Հայաստանում առայժմ չկան կադրային քաղաքականության չափանիշներ, ներկուսակցական դեմոկրատիայի մեխանիզմներ, և այս ամենը տեղի է ունենում ավելի շատ ֆորմալության շրջանակներում։ Ուստի երբեք պետք չէ մոռանալ, որ հեղափոխության տրանսֆորմացիան պետական քաղաքականության բարդ ու բազմաշերտ գործընթաց է, որի տարբեր հանգրվաններում կարող են լինել ոգևորության և հիասթափության առիթներ։ Հիմա Հայաստանը գտնվում է հենց այդ փուլում՝ բացված հնարավորություններով ու առաջացող ռիսկերով հանդերձ։
«Առաջին լրատվական»- ի հետ թեմայի քննարկմանն այսօր մասնակցեցին բլոգեր Իզաբելլա Աբգարյանը, «Ազատ դեմոկրատներ» կուսակցության վարչության անդամ Նարեկ Այվազյանը և գրող Սարգիս Հովսեփյանը:
Ի. Աբգարյանի դիտարկմամբ՝ Հայաստանում միշտ է եղել կադրերի խնդիր, «Հսկայական ՀՀԿ-ն նույնպես ունեցել է կադրերի խնդիր, այլապես նույն դեմքերին անընդհատ չէին տեղափոխի մի պաշտոնից մյուսը: Սխալ մոտեցում է, երբ շատերն կարծում են, որ նոր իշխանությունը երիտասարդ թիմ է, դրա համար կադրային խնդիր կունենա: Կադրային քաղաքակնության խնդիրն այն է, որ իշխող ուժը չի ուզում ընդարձակել սահմանները և կադրեր փնտրել թեկուզ անկուսակցականների կամ այլ կուսակցությունների շրջանում, որոնք իշխանության մեջ չեն եղել, պետք է ընտրել՝ պրոֆեսիոնալ որակներից ելնելով»:
Բլոգերի կարծիքով՝ Երևանի քաղաքապետը պետք է ունենա քաղաքական գործչին բնորոշ հատկանիշներ և կարողանա համակարգել աշխատանքները:
Նարեկ Այվազյանը նշեց, որ Հայաստանում կադրային խնդիրն առկա է անկախությունից ի վեր: Նրա կարծիքով՝ էական է, թե ինչ գաղափարախոսություն է ներդրվելու կառավարման համակարգում. սկսած սովորական օրենքներից մինչև Սահմանադրություն պետք է վերանայվի»:
Սարգիս Հովսեփյանի կարծիքով՝ կադրային հարցը այս պահին ամենակարևոր հարցերից է. «Երևաց, որ նոր կառավարությունում շատ ազնիվ մարդիկ կարող են լինել, բայց տարբեր պատկերացումներ ունենալ, և դա խնդիրներ կառաջացնի հենց ներսում: Քանի որ կադրերի սղություն կա, նոր կադրերը հաճախ ընտրվում են ազնվության չափանիշով» :
Ս. Հովսեփյանի դիտարկմամբ՝ հակահեղափոխությունը կարող է գալ հենց նոր կադրերի դեմքով: Նրա խոսքով՝ նախորդ մշակույթը եթե գա, հակահեղափոխությունը կհաղթի:
Ի. Աբգարյանի խոսքով՝ ՀՀԿ-ն անընդհատ ուզում է ցույց տալ, որ վատը չի եղել, որ հիմա էլ նույնը կրկնվում է: «Նրանք ակամա արդարանում են: ՀՀԿ-ից հակահեղափոխություն սպասելը ծիծաղելի է: Շատ ավելի վտանգավոր են նրանք, ովքեր ծափահարում են Նիկոլ Փաշինյանին»,- ընդգծեց բլոգերը:
Մանրամասն՝ տեսանյութում:
