ՀՌԱԿ ատենապետ Էդուարդ Անտինյանը, կարծիք հայտնելով քաղաքական դաշտում երրորդ ուժի առաջ գալու մասին, ասում է, որ դա պայմանական տերմին է, և պարտադիր չէ, որ այդ երրորդ այլընտրանքը ներկայացնի մի քաղաքական ուժ։
«Իհարկե, կձևավորվեն նոր ուժեր, և ես կարծում եմ՝ մեկից ավելի ուժեր։ Եթե մենք ուզում ենք, որ այդ ուժը գաղափարական լինի, պետք է մեկից ավելի լինի»,- ասում է Անտինյանը՝ բոլոր ուժերի համախմբումը ՀԱԿ-ի և իշխանությունների դեմ համարելով հակաքաղաքական։ «Գոնե մի անգամ անձերից ձերբազատվեն, գաղափարական հիմքի վրա համախմբվեն՝ սոցիալիստները մի տեղ, լիբերալները՝ մի տեղ և այլն»,- ասում է Անտինյանը։
Երկխոսություն ձևավորման այս փուլում շահեց իշխանությունը, սակայն հետո շահելու է նաև այն ընդդիմությունը, որը դեմ է անձերի շուրջ ձևավորված ուժերին՝ կարծում է ՀՌԱԿ ատենապետը։
Ասուլիսի ժամանակ անդրադարձ եղավ նաև Լեռնային Ղարաբաղի հարցի կարգավորման գործընթացի ներկա փուլին։ «Ժողովուրդը պատաստ չէ ոչ խաղաղության, ոչ պատերազմի։ Այն ուժերը, որոնք դեմ եմ զիջումներին, պետք է ասեն՝ նախագահ, դու զիջումների մի գնա, մենք կպատրաստենք ժողովրդին պատերազմի»,- ասում է Էդուրադ Անտինյանը։
Ըստ ԱԺ ՀՀԿ-ական պատգմավոր Հակոբ Հակոբյանի՝ ներկա փուլից կտուժեն բանակցող կողմերը՝ Հայաստանն ու Ադրբեջանը, քանզի մեծացել և վճորոշ է դարձել գերտերությունների հետաքրքրությունը այս տարածաշրջանի հանդեպ։
«Մեծացել է Իրանի, ԱՄՆ-ի հետաքրքրությունն այս տարածաշրջանում։ Կարևոր է նաև Nabucco գազատարի գործոնը, որը ոչ ռուսական գազ է ոչ ռուսական խողովակով, և դրա միջոցով Եվրոպան Ռուսաստանից էներգետիկ անկախություն է ձեռք բերում»,- ասում է Հակոբ Հակոբյանը։
Անտինյանի գնահատմամբ՝ իրավիճակը բարենպաստ է Հայաստանի համար, քանի դեռ ԱՄՆ- Եվրոպա, Իրան-Ռուսաստան շահերը չեն համընկնում այս տարածաշրջանում։