«Թավշյա հեղափոխությունից հետո ոգևորում է այն փաստը, որ այն տալիս է հնարավորություն վերանայել մեր մշակութային ճանապարհը: Վերանայելն արդեն հեղափոխություն է մշակույթում: Ամենակարևորը՝ պետական մոտեցում պետք է լինի՝ նպաստել ինքնաճանաչողությանը. ով է հայը, հայի ֆենոմենը: Պետական գաղափարախոսություն պետք է ունենանք: «Առաջին լրատվական»- ի հետ զրույցում այս մասին ասաց Հայաստանի ժողովրդական արտիստ, օպերային երգիչ Բարսեղ Թումանյանը՝ հավելելով, որ եթե ունենք խնդիրներ, ապա առանց դրանց բացահայտման չենք կարող որևէ քայլ անել:
Երգահան, կոմիտասագետ Արթուր Շահնազարյանը հավելեց, որ նոր սերունդն այդ մեծ նվերը մատուցեց իր հայրենիքին: «Մարդիկ ոնց որ գերությունից դուրս եկած լինեն… Չպետք է քննադատել, այս պահին քննադատությունը սրբապղծություն է, մենք մշակույթի մասին խոսելով՝ միայն ուզում ենք օգտակար լինել: Մշակույթի նախարարությանն ուզում ենք ասել, որ նախարարության պետական միջոցները պետք է ուղղվեն բարձրակարգ մշակույթին»:
«Աղետ է. այլասերված երգիչը կարող է ստադիոն լցնել, Կոմիտաս երգողը՝ ոչ,- նշեց երգահանը՝ շարունակելով խոսել իր մտահոգությունների մասին: – Մեր մշակույթը պետք է ապակենտրոնացվի, Երևանից տեղափոխվի նաև մարզեր:
Մենք ունենք ֆիզիկական հայրենիք և նաև հոգևոր հայրենիք, եթե հոգևոր հայրենիքի սահմանները հանձնենք, ամեն ինչ կկորցնենք: Թշնամին ներխուժել է մեր հոգևոր մշակութային սահմանը և ավերածություններ է գործում: Այլասերված ելևէջները տարածել են»:
Մեր զրուցակիցների դիտարկմամբ՝ մենք դոփում ենք տեղում, մշակույթը զարգանում է, մենք չենք զարգանում:
Մանրամասն՝ տեսանյութում: