Որպեսզի մազերը հարթ ու մետաքսե լինեն, իսկ մաշկն ու եղունգները՝ անթերի, Լոնդոնի կենդանաբանական այգու 64 կիլոգրամ քաշ ունեցող Էֆֆի գորիլան սկսել է ընդունել մարդկանց համար նախատեսված վիտամիններ ու հավելումներ: Այս մասին հայտնում է fedpost.ru-ն:
Այս տարի Դևոնի կենդանաբանական այգուց Լոնդոն է բերվել արու Կումբուկան, սակայն Էֆֆին չի կարողացել գրավել փեսացուի ուշադրությունը:
Ձգտելով հետաքրքրություն առաջացնել արուի մեջ՝ կենդանաբանական այգու աշխատակիցները որոշել են փոխել էգ գորիլայի արտաքին տեսքը: Այդ իսկ պատճառով նրա սննդակարգում ավելացվել են վիտամիններ և հավելումներ:
Հարկ է նշել, որ վիտամինների պարբերաբար օգտագործումից հետո Էֆֆին սկսել է գրավել պոտենցիալ փեսացուի ուշադրությունը: Կապիկի մաշկն ավելի է լավացել, իսկ մորթին դարձել է ավելի հաստ:
Էֆֆին ծնվել է Կենտրոնական Աֆրիկայի անտառներում և 2007-ին տեղափոխվել Լոնդոնի կենդանաբանական այգի:
Գորիլաները համարվում են ամենամեծ կապիկները: Հասուն արուները կարող են կշռել 160-270 կգ, իսկ էգերը՝ 68-140կգ: Վայրի բնության մեջ նրանց կյանքի միջին տևողությունը 35 տարի է, իսկ կենդանաբանական այգիներում՝ 35-45 տարի: Ամենածեր գորիլան սատկել է 54 տարեկանում:
