«Որպեսզի հեղափոխությունը դրական ազդեցություն ունենա, ապա դա պետք է նախևառաջ նպաստի տնտեսական, քաղաքական, սոցիալական և բարոյահոգեբանական գործընթացների առողջացմանը, այսինքն՝ ամեն ինչ կախված է լինելու նրանից, թե մոտակա ժամանակներում այս թավշյա հեղափոխությունն իր դրական ներուժը կմեծացնի, թե ոչ»,- «Առաջին լրատվական»-ի հետ զրույցում նշեց ժողովրդագիր Ռուբեն Եգանյանը՝ պատասխանելով հարցին, թե ի՞նչ դերակատարում կարող է ունենալ թավշյա հեղափոխությունը Հայաստան հայրենադարձություն ապահովելու հարցում, որքանո՞վ կարող է այն նպաստող գործոն հանդիսանալ ներգաղթի համար։
Ըստ Ռուբեն Եգանյանի՝ այսօր Հայաստանը չունի հնարավորություններ ծավալուն և մասսայական ներգաղթ ապահովելու համար։ Նրա խոսքերով՝ հեղափոխությունը կարող է միայն սկիզբ հանդիսանալ, բայց դրան պետք է հաջորդեն բազմաթիվ այլ գործընթացներ, որոնք մարդկանց մոտ պետք է վստահություն ձևավորեն առ այն, որ դրական փոփոխություններն անդառնալի են, շարունակական են լինելու և էական նշանակություն են ունենալու իրենց կենսամակարդակի, հեռանկարների ու միջավայրի բարելավման վրա։
«Մինչ այս փոփոխությունները՝ մենք 20 տարի խաբել ենք մեր Սփյուռքին և նրանց օգտագործել ենք որպես կթու կով․ թե հին Սփյուռքից, թե նոր Սփյուռքից եղել են բավականին շատ մարդիկ, ովքեր պայծառ գաղափարներով, մեծ գումարներով եկել են Հայաստան, բայց հետ են վերադարձել հուսախաբված ու առանց իրենց գումարի, ուստի յուրաքանչյուր նման բացասական դեպք շատ արագ տարածվում է դրսում ու ստեղծում է հանրային կարծիք ընդհանուր Հայաստանի մասին, իսկ հիմա սա պետք է հաղթահարվի, կոտրվի այդ մտածելակերպը, որի համար բավականին ժամանակ և արդյունքներ են պետք, իսկ այս պահի դրությամբ Սփյուռքում, միանշանակ, կա վստահության դեֆիցիտ Հայաստանի նկատմամբ»,- շեշտեց Ռուբեն Եգանյանն ու այս համատեքստում հավելեց․ «Հիմա նոր կառավարությունը պետք է մտածի, թե ինչ ճանապարհով է հնարավոր աշխատատեղերի թիվը մեծացնել և փորձել սահմանափակել մարդկային այն արտահոսքը, որն ունենք, բայց հեղափոխական մոտեցումներ դեռևս չկան»։
Մանրամասները՝ տեսանյութում։