«Ես կարծում եմ, որ կառավարության աշխատակազմում երկու հրաժարականները անփորձության հետևանք էին, թեև հրաժարականների թեմաները տարբեր էին»,- «Առաջին լրատվական»-ի հետ զրույցում ասաց քաղաքագետ Հայկ Բալանյանը՝ հավելելով, որ երկու պարագայում էլ բացակայում էր գիտակցությունը, թե ինչ է պետական ծառայողը:
Քաղաքագետը կարծում է, որ նոր իշխանության կադրային քաղաքականության սկզբունքներից մեկն այն է, որ քաղաքական պաշտոնի նշանակվում են թիմի մարդիկ, որոնք դեռ չունեն վարչական աշխատանքի փորձ: Երկրորդ սկզբունքը, ըստ քաղաքագետի, պաշտոնների են նշանակվում նախկին ապարատից նեղացած անձինք, որոնք, այսպես ասած, հավատարմության երդում են տալիս նոր կառավարությանը:
««Քաղաքացիական պայմանագիր»-ը և «Ելք» դաշինքը չունեն կադրային ռեսուրս, ուստի մենք տեսնում ենք առկա խնդիրները: Այդ կադրային ռեսուրս չունենալն էլ ստիպում է դիմել պրոֆեսիոնալների, որոնց մեջ էլ, պարզվում է, բազմաթիվ խնդիրներ կան»,- նկատեց Հայկ Բալանյանը:
Հարցին՝ արդարացվա՞ծ է քաղաքացիական ակտիվիստներին նշանակել պաշտոններում՝ այն դեպքում, երբ նրանք կոչված էին նաև նոր իշխանության գործունեությունը խոշորացույցի տակ պահելու, քաղաքագետը պատասխանեց. «Արդարացված-չարդարացվածը պետք է դիտարկել երկրի զարգացման տեսանկյունից. եթե այս կադրային սովի պայմաններում այդ մարդիկ կարողանան լավ գործ անել, ուրեմն արդարացված է: Եվ այնպես չէ, որ Հայաստանում նոր ընդդիմություն չի ստեղծվի: Ես չեմ կարծում, որ Հայաստանի բնականոն և կայուն զարգացումը պետք է կախված լինի, թե քանի գրանտ կգա, որ կուսակցություններից դուրս ինչ-որ խմբեր ստեղծվեն և քննադատեն իշխանությանը. սա արատավոր ճանապարհ է»: Նրա համոզմամբ՝ պետք է կայանա քաղաքական դաշտը, իսկ քաղաքական դաշտը կայանում է կուսակցություններով՝ իշխանության և ընդդիմության մեջ:
Հայկ Բալանյանը ցավալի է համարում, որ կառավարման մեջ պահպանվել է ժառանգականությունը. «Այն սոցիալ-տնտեսական և սոցիալ-քաղաքական համակարգը, որ կար Հայաստանում, տնտեսության մեջ, կառավարման մոտեցման մեջ դեռևս մնում է: Այս իշխանությունը հատկապես տնտեսական կառավարման մեջ դեռևս բեկումնային փոփոխություններ չի մտցրել»:
Մանրամասները՝ տեսանյութում:
