ՀՀ որոշ օրենսդիրներ տարին փակում են՝ այդպես էլ որևէ օրենք չներկայացնելով խորհրդարանի դատին: Ներկայացնում ենք «Առաջին լրատվական»-ի զրույցը ԲՀԿ Մասիսի պատգամավոր Տիգրան Ստեփանյանի հետ:
– Պարոն Ստեփանյան, Ձեր օրենսդիր աշխատանքը ինչպե՞ս եք գնահատում անցնող տարում: Քանի՞ օրենք եք գրել այս տարի:
– Ոչ մի:
– Ինչո՞ւ:
– Նոր եմ որոշել գրել, որոշել եմ, որ մյուս տարվա մեջ գրեմ:
– Ինչո՞ւ եք այդպես որոշել, այս տարի անհրաժեշտություն չէի՞ք տեսնում, թե՞…
– Բացարձակապես: Գիտեինք, որ գրեինք, չէր անցնելու մեր օրենքը: Քանի անգամ գրեցին մեր տղաները մեր կուսակցությունում, ու ոչ մեկը չանցավ:
– Ասել է թե՝ դա՞ է պատճառը, որ Դուք օրենքներ չեք գրում:
– Հա, մեկ ա չէր անցնելու:
– Իսկ եկող տարի ի՞նչ է փոխվելու, որ ուզում եք սկսել օրենքներ գրել. էլի կարող է չընդունվեն այդ օրենքները:
– Տեսնենք՝ ինչ կփոխվի: Կփորձենք, կանցնի՝ կանցնի:
– Իսկ ինչի՞ մասին եք օրենք գրելու, պարոն Ստեփանյան:
– Երբ որ գրեմ, այդ ժամանակ կտեսնեք:
– Իսկ որպես ԲՀԿ պատգամավոր, ինչպե՞ս կգնահատեք ԲՀԿ անցյալ տարվա գործունեությունը: Այ, ԲՀԿ-ն ասում է՝ մեր խոսքը գործ է. կոնկրետ ի՞նչ է արել:
– Շատ բարձր է եղել ԲՀԿ գործունեությունը: Ժողովրդի բոլոր խնդիրները իր հնարավորության սահմաններում լուծել է:
– Պարոն Ստեփանյան, հետաքրքիր է իմանալ՝ Դուք ինչպե՞ս եք գնահատում պարտադիր կուտակային կենսաթոշակի ներդրման գաղափարը:
– Մենք դրան արդեն դեմ ենք քվեարկել:
– Իսկ ի՞նչն է պատճառը, որ Դուք, գործարար ԲՀԿ-ականները չեն մասնակցում կուտակային կենսաթոշակի դեմ ակցիաներին:
– Եթե պետք լինի որ մասնակցենք, մենք կմասնակցենք: Խնդիր դրված չի, որ գործարարները պիտի չմասնակցեն՝ մնացածը պիտի մասնակցեն: Ես էստեղ չեմ եղել, Հայաստանում չեմ եղել: