Երեկ Կառավարությունում քաղաքական ուժերի Ընտրական օրենսգրքի փոփոխությունների շուրջ ընթացող քննարկման ժամանակ հնչեցին տարբեր առաջարկներ Ընտրական օրենսգրքի փոփոխության, առաջարկվող մեխանիզմների ներդրման վերաբերյալ։
«Ժառանգություն» կուսակցությունն առաջարկում է ընտրություններում դեմքի ճանաչման համակարգ ներդնել, բլոկչեյն տեխնոլոգիաների կիրառմամբ բացառել կրկնաքվեարկությունները և այլն։
Կուսակցության նախագահ Արմեն Մարտիրոսյանը հանդիպումը ընդհանուր առմամբ գնահատում է լավ, իրենց առաջարկների մեծ մասն ընդունվել է։ «Առաջին լրատվական»-ի հետ զրույցում Մարտիրոսյանն ասաց, որ բլոկչեյն համակարգը շատ հեշտությամբ հնարավոր է ներդնել հայաստանյան իրականությունում, մարզերում, տարբեր գյուղերում և քաղաքներում։ «Մարդիկ, ովքեր տիրապետում են սմարթֆոնին, մի քանի դասընթացի շնորհիվ կկարողանան ամբողջությամբ օգտվել համակարգից»,- նշեց նա։
Դեմքի ճանաչման և բլոկչեյն համակարգերի ներմուծումը կարժենա 4 մլն դոլար՝ ասում է «Ժառանգություն» կուսակցության նախագահը։ Բլոկչեյն համակարգը թույլ կտա ընտրատեղամասերում բացառել կրկնաքվեարկությունը, որևէ փոփոխություն կատարել արդեն քվեարկած մարդկանց ցուցակներում, նրանց քանակում և մնացած տվյալներում։ Մարտիրոսյանի վստահեցմամբ՝ ծրագիրն աշխարհում լայն կիրառություն ունի։
Ի դեպ, այս ծրագիրը ներդրվելու է նաև պետական ոլորտում, ըստ կարևորության, հատկապես կադաստրում, առողջապահության ոլորտում, որը հնարավորություն կտա նվազեցնել, եթե ոչ՝ ամբողջությամբ բացառել կոռուպցիան։
Մանրամասները՝ տեսանյութում:
