Հանցավորության դեմ պայքարը ընդհանրապես պետության կարևոր հանձնառությունն է: Հանցավորության դեմ արդյունավետ պայքարն է, որ կոչված է երաշխավորելու մարդու իրավունքներն ու ազատությունները, հաստատելու սոցիալական արդարություն, ապահովելու իրավակարգի հաստատումը և իրավունքի գերակայությունը: Այս մասին «Առաջին լրատվական»- ի հետ զրույցում ասաց ՀՀ ՄԻՊ Արման Թաթոյանը:
Նրա խոսքով՝ կոռուպցիոն բնույթի հանցագործությունները արգելակում են հասարակության և պետության զարգացումը, հետևաբար այս հանցագործությունների հանդեպ քրեական պատասխանատվության առումով պետք է լինի անխուսափելիություն, խիստ պատիժներ, հասարակության բացարձակ անհանդուժողական վերաբերմունք, հակառակ դեպքում հնարավոր չէ որևէ արդյունքի հասնել, մյուս կողմից՝ շատ կարևոր է իրավական ընթացակարգերի պահպանումը, որովհետև հանցավորության դեմ պայքարի իրավաչափ նպատակը չի կարող արդարացնել իրավունքների խախտումները:
ՄԻՊ-ի դիտարկմամբ՝ դրական է, որ իրավապահ մարմիններ սկսել են ավելի շատ տեղեկություններ տրամադրել հանրությանը: «Սա ապահովում է նաև հանրային վստահությունը: Միաժամանակ շատ կարևոր է, որ հայտարարություններով, տեսանյութերով չներկայացվի մարդու մեղավորության վերաբերյալ ապացույցները որպես հաստատված փաստ, որպես անհերքելի ապացույց: Պետք է շատ զգուշ լինել, և չպետք է այնպիսի հայտարարություններ լինեն, որոնք քրեական կոնկրետ վարույթի հետ կապ չունեն և կարող են հասարակության մեջ զգացումներ ձևավորել»:
Մանրամասն՝ տեսանյութում:
