«Առաջին լրատվական»-ն արդեն անդրադարձել է մսի շուկայում տեղի ունեցող խնդիրներին, ավելի կոնկրետ՝ գյուղացիները, ովքեր զբաղվում են անասնապահությամբ, չեն կարողանում միսն իրացնել սուպերմարկետներում։
«Առաջին լրատվական»-ի հետ զրույցում «Նոր Զովք» սուպերմարկետի մսավաճառ Տիգրան Լապայանը, որը գյուղացիների հետ մի քանի օր առաջ կառավարության դիմաց բողոքի ակցիա էր իրականացնում, նշեց, որ իրենք գյուղացուց միս չեն ընդունում, ընդունելու դեպքում մեկ կգ-ի մեջ 650-700 դրամ թանկացում պետք է անեն, դրան գումարած 300 դրամ խանութի այլ ծախսերը։
«Եթե թանկանար 600 դրամով՝ 2980 դրամից կդառնար 3580 դրամ, բայց մեզ մոտ այս պահին թանկացել է 300 դրամով։ Մենք հիմա միսը ստանում ենք ու ինքնարժեքից վաճառում ենք այնքան թանկ, որ կարողանանք վճարել 20 տոկոս ԱԱՀ-ն։ Առավոտները դուք պետք է տեսնեք՝ ինչպես են գյուղացիները մեզ խնդրում միսը վերցնել ու խոստանում են, որ երբեք չեն զբաղվի էս գործով։ Մսավաճառների կրճատում է տեղի ունենում, աշխատավարձերի նվազեցում»,- մտահոգություն հայտնեց Տիգրան Լապայանը։
Նրա խոսքով՝ կառավարության մոտ բողոքի ակցիայից հետո իրենք արձագանք չեն ստացել։ Իսկ նախկինում 20 տոկոս ԱԱՀ-ի մասով ներքին պայմանավորվածություն է եղել, 20 տոկոսը չի վճարվել, դրա համար այս խնդիրը չի առաջացել։ «Ես հիմա իմ շահերից չեմ խոսում։ Դրսից լիքը մարդ պատվիրել է միս, տեղական միսն արդեն կսկսի չվաճառվել, գյուղացին չի պահի անասուն, ու տարբեր երկրներից կներմուծեն»,- ասաց նա։ Մսավաճառի խոսքերով՝ եթե իմանան, որ այս խնդիրը ժամանակավոր է, կշարունակեն ստանալ տեղական միս, աշխատել առանց եկամտի, եթե ինչ-որ ժամանակ հետո հարցը լուծվի։
