Անդրադառնալով Թուրքիայի ազգային մեծ ժողովի հունիսի 12-ի ընտրություններին՝ «Ազգ»-ը» տեղեկացնում է, որ ընտրություններում որևէ թուրքահայ թեկնածու պատգամավոր չի առաջադրվել, սակայն «Ջիհան» լրատվական գործակալության վկայությամբ, պատգամավոր է ընտրվել հայկական հարցի երկու մասնագետ:
«Առաջինը Անկարայի համալսարանի լեզվի, պատմության և աշխարհագրության ֆակուլտետի դասախոս, պրոֆ. Սեյիթ Սերթչելիքն է, առաջադրված վարչապետ Էրդողանի «Արդարություն և բարգավաճում» կուսակցությունից: Մյուսը «Գորշ գայլերի» քաղաքական կազմակերպության՝ Ազգայնական շարժում կուսակցության անդամ, Թուրքական պատմական ընկերության նախկին նախագահ, պրոֆ. Յուսուֆ Հալաչօղլուն է: Հալաչօղլուն հայտնի է մեր հասարակությանը: Ինչ վերաբերում է Սերթչելիքին, ապա նա, «Ջիհանի» իրազեկմամբ, իր դոկտորականը պատրաստել է Ռուսաստանում՝ օգտվելով Մոսկվայի և Սանկտ Պետերբուրգի արխիվներից և հայերենին տիրապետող միակ թուրք պատմաբանն է: Նրա «Հայկական հարցի ծագումը ըստ ռուսական և հայկական աղբյուրների 1678-1914» վերնագրով աշխատությունը 2009-ին թուրքերեն և անգլերեն հրատարակել է Թուրքիայի ազգային մեծ ժողովը: «Ջիհանը» նշում է, որ հայկական հարցի մասին Սերթչելիքն ունի 1914-18 թթ. ընդգրկող նոր աշխատություն, որի հրատարակումը նախընտրական քարոզարշավի պատճառով ժամանակավորապես հետաձգվել է»,- գրում է թերթը: