Ճապոնիայում մահապատժի ենթարկված Աում Սինրիկե տոտալիտար կրոնական աղանդի հիմնադիր Սեկո Ասահարայի մարմնի դիակիզումը տեղի է ունեցել այսօր առավոտյան, Տոկիոյում։ Ինչպես նշվում է, Ասահարայի աճյունը հանձնվելու է նրա չորրորդ դստերը։ Այդ որոշումը կայացվել էր նախքան մահապատիժը։
29-ամյա դուստրը մինչ այդ հայտարարել էր, որ չի շփվում ծնողների հետ և կապ չունի Աում Սինրիկեի հետ։
The Japan Times-ը գրում է, որ աղանդի հիմնադրի չորրորդ դուստրը Սատոկա Մացումոտոն է։
Աճյունը ստանալու համար պայքարում են նաև Ասահարայի կանայք և չորս մյուս երեխաները։
Ճապոնիայի արդարադատության նախարարությունում հայտարարել են, որ աճյունը հասնում է նրան, ում ինքը՝ մահապատժի ենթարկվածն է ընտրում։
Հիշեցնենք, որ Աում Սինրիկեի ղեկավարներից վերջինին ձերբակալել են 2012 թվականի ամռանը։
