Թուրքիայում աշխատանքից հեռացվել են կոռուպցիոն սկանդալը հետաքննող ոստիկանության բարձրաստիճան աշխատակիցները: Այս մասին գրում է Hürriyət-ը:
Հաղորդվում է, որ հեռացվել են ֆինանսական հանցագործությունների, կազմակերպված հանցավորության,մաքսանենգության, ահաբեկչության դեմ պայքարի դեպարտամենտերի պետերը:
Երեկ Թուրքիայի ոստիկանությունը հատուկ գործողություն էր իրականացրել երկրի այնպիսի քաղաքներում, ինչպիսիք են Ստամբուլն ու Անկարան: Գործողության արդյունքում ձերբակալվել էր 52 մարդ, այդ թվում՝ գոծարարներ և որոշ նախարարների որդիներ:
Գործարարները ձերբակալվել էին կոռուպցիայի, մաքսանենգության ու թմրամիջոցների իրացման մեղադրանքներով:
Ձերբակալվածների թվում են իշխող կուսակցության անդամ հանդիսացող մի քանի նախարարների որդիներ: Նրանք են էկոնոմիկայի, ներքին գործերի, քաղաքաշինության և շրջակա միջավայրի հարցերով նախարարների որդիները: Երեքն էլ ձերբակալվել են կոռուպցիոն մեղադրանքով:
Նույն գործողության շրջանակում ձերբակալվել են հայտնի ձեռնարկատեր, Ստամբուլի Ֆաթիհ համայնքի ղեկավար Մուստաֆա Դամիրը, թուրքական «Հալգ բանկի» գլխավոր տնօրեն Սուլեյման Ասլանը և հայտնի ձեռնարկատեր Ալի Ագաօղլուն: