Հայաստանի Հանրապետության Ազգային անվտանգության ծառայությունը ձերբակալել է «Հայաստան» համահայկական հիմնադրամի տնօրենին, որն ըստ ներկայացվող մեղադրանքի և ինչպես պաշտոնապես ասվում է՝ ըստ իր խոստովանության, «Հայաստան» համահայկական հիմնադրամի բանկային քարտից օնլայն խաղադրույքներ է կատարել: Այսինքն՝ համահայկական հանգանակությունը Հիմնադրամի գործադիր տնօրենը վերածել է խաղադրույքի:
Ամբողջ հարցն այն է, թե անցած տարիներին ինչո՞վ է զբաղված եղել հիմնադրամի հոգաբարձուների խորհուրդը, որի ղեկավար կազմում են եղել Հայաստանի և Արցախի նախագահները, Ամենայն հայոց կաթողիկոսն ու այլ երևելի դեմքեր, որոնք տարին մեկ անգամ կամ մի քանի անգամ հավաքվել են, հնչեղ ճառեր արտասանել հիմնադրամի կարևորության, ծրագրերի մասին, իսկ հիմնադրամի փողերը, պարզվում է, վերածվել են խաղադրույքների: Ուստի այս հարցը միայն հիմնադրամին չի առնչվում, այլ ընդհանրապես Հայաստանի կառավարմանը, որի կարծես թե յուրաքանչյուր սանտիմետր թաթախված է որևէ չարաշահման, կոռուպցիոն որևէ սխեմայի, գանձագողության և այդօրինակ այլ հանցագործությունների մեջ: Հարցն ավելի գլոբալ է, երբ փորձում ես հասկանալ. իսկ մինչև ո՞ւր է ձգվում այդ արատավոր շղթան:
Թեմայի շուրջ «Առաջին լրատվական»- ի հետ քննարկմանը մասնակցեցին միջազգայնագետ Հովհաննես Իգիթյանը, փաստաբան Արմինե Ֆանյանը և քաղաքագետ Նարեկ Սամսոնյանը:
«Այսօր կարելի է միանշանակ ասել, որ աշխարհը հավատում է Հայաստանի անկեղծությանը կոռուպցիայի դեմ պայքարում: Նախկինում հանրապետականներից միայն ամենածույլը չէր խոսում կոռուպցիայի դեմ պայքարի մասին, բայց բոլորը հասկանում էին, որ դա իմիտացիա է: Այսօր Հայաստանում ընթացող գլոբալ պրոցեսը ընկալվում է որպես կոռուպցիայի դեմ համակարգային պայքար»,- նշեց Հ. Իգիթյանը:
Անդրադառնալով «Հայաստան» հիմնադրամի տնօրենի ձերբակալությանը և նրա կողմից գումարներ յուրացնելու և վատնելու փաստին, Իգիթյանն այն բնոշեց որպես խայտառակություն, տխուր փաստ. «Երևի Հայաստանում որևէ սրբություն չմնաց, որը նախկին իշխանավորները չեն վարկաբեկել: Փաստորեն հինադրամի գումարները վատնվել են կազինոներում»:
«Ըստ պաշտոնական լրահոսի՝ խոսքը վերաբերում է գումարի առանձնապես խոշոր չափերի վատնմանը, որը հափշտակության եղանակներից մեկն է և դասվում է ծանր հանցագործությունների շարքին»,- նշեց փաստաբան Ա. Ֆանյանը:
Քաղաքագետ Նարեկ Գալստյանի խոսքով՝ տուժեց Համահայկական հիմնադրամի միջազգային վարակնիշը:
Մանրամասն՝ տեսանյութում:
