Հայաստանում առաջիկայում կայանալիք արտահերթ ընտրությունները շատերի կարծիքով բացառիկ կլինեն Հայաստանի պատմության մեջ՝ դրանց արդար, թափանցիկ և ժողովրդավարության բոլոր չափանիշներին համապատասխանելու իմաստով։ Ընտրությունները կանցկացվեն մեկ տարվա ընթացքում՝ առայժմ կոնկրետ ժամկետը հստակ չէ, բայց հայտնի է, որ Ընտրական օրենսգրքի փոփոխության շուրջ այժմ աշխատանքներ են տարվում և առաջիկայում կլինեն նաև քննարկումներ քաղաքական ուժերի միջև։
Այս ընտրություններին չի լինի ընտրակաշառք, վարչական ռեսուրսի, թաղային հեղինակությունների միջամտություն, բայց արդյոք կլինի գաղափարական պայքար։ Թավշա, ոչ բռնի ժողովրդական հեղափոխությունից հետո էյֆորիայի մեջ գտնվող հասարակությանը թերևս դժվար կլինի համոզել հետևել մասնակցող քաղաքական ուժերի քարոզարշավներին, ծրագրային դրույթներին, առաջ քաշվող քաղաքական օրակարգին։
Քաղաքագետ, «Քաղաքացիական գիտակցություն» ՀԿ նախագահ Նարեկ Սամսոնյանի խոսքերով՝ առայժմ մշուշոտ է ընտրությունների անցկացման ժամանակահատվածը, քիչ են նաև այդ ընտրությունների անցկացման իրավական հիմքերը։ «Եթե այդ ընտրությունները պետք է անցկացվեն սպառնալիքով, ինչպես շատ բաներ են եղել սպառնալիքով. «եթե չեք անում, ուրեմն փողոցները կողողենք», ուրեմն այդ ընտրությունների անցկացման ժողովրդավարական ընթացքը, բազմակարծությունն ու մրցակցությունը խիստ հարցականի տակ են լինելու»,- «Առաջին լրատվական»-ի հետ զրույցում ասաց նա։
Նարեկ Սամսոնյանը հավելում է՝ եթե ընտրությունները լինեն բոլորի համաձայնությամբ, Ղարաբաղում իրավիճակի համեմատաբար հանգիստ լինելու պայմաններում գուցե հնարավոր կլինի ստանալ ժողովրդավարության չափանիշներին համապատասխան ընտրություններ. «Խիստ կարևոր է նաև Ընտրական օրենսգրքի ինչպիսին լինելը՝ խոսակցություններ կան, որ հնարավոր է նոր ԸՕ-ը թույլ տա 3 տոկոսի նվազագույն շեմ»։
«Ժառանգություն» կուսակցությունը հայտարարում է՝ եթե ընտրություններին մասնակցեն միայնակ, չեն լինելու իշխանություններին ընդդիմադիր, քանի որ մասնակցություն են ունեցել թավշա հեղափոխության իրականացմանը։ Արդյոք դաշտը կբաժանվի սևի ու սպիտակի, հարցին ի պատախան, Նարեկ Սամսոնյանն ասաց. «Ընդդիմություն այնուամենայնիվ լինելու է, իշխանության անունով ընտրություններին մասնակցելու իրավունք է ունենալու միայն Նիկոլ Փաշինյանի թիմը, մնացած բոլորը, ովքեր կփորձեն յուրացնել դա, չի ստացվելու։ Ի դեպ՝ այնպես չէ, որ Նիկոլ Փաշինյանի հեղինակությունը 100 տոկոսանոց է։ Որքան էլ փորձ արվի ներկայացնել, որ Նիկոլ Փաշինյանի ռեյտինգն այդքան բարձր է, այդպես չէ։ Նիկոլ Փաշինյանին ընդդիմություն լինելը շատ ավելի հեշտ է լինելու, քան մինչ այդ եղած բոլոր իշխանություններին, որովհետև քաղաքական առումով, երբ այս պաթոսային, շոուի մակարդակով ապրող հասարակությունը մտնի ռացիոնալ դաշտ, Նիկոլ Փաշինյանին շատ ավելի հեշտ կլինի լինել ընդդիմություն, քան նախկին բոլոր իշխանություններին։
Քաղաքագետ Գագիկ Համբարյանի խոսքերով՝ կարևոր է, թե երբ են տեղի ունենալու արտահերթ ընտրությունները։ «Չեմ կարծում, որ էյֆորիկ իրավիճակը կարող է երկար տևել։ Մենք ամեն օր տեսնում ենք, որ ինչ-որ ձերբակալություններ են տեղի ունենում, ինչ-որ մարդկանց են բերման ենթարկում, բայց կոնկրետ շատ խոշոր շնաձկների հետ կապված ոչինչ չկա։ Միակ խոշոր «շնաձուկը», որին որսացին, Ալեքսանդր Սարգսյանն էր, այն էլ որքան տեղյակ եմ՝ 2-3 ժամ էր մնացել ոստիկանության բաժանմունքում։ Վտանգավորն այն է, որ հասարակությունը այժմ էյֆորիա մեջ է․եթե հետևեք սոցցանցերի գրառումներին, Սերժ Սարգսյանի եղբորը բերման ենթարկելը ուղղակի ցնծություն առաջացրեց այն դեպքում, երբ շատ շատերը, այդ թվում՝ ես, համոզված էինք, որ նա որոշ ժամանակ անց ազատ կարձակվի։ Չեմ կարծում, որ այս աշխատելաոճով Նիկոլ Փաշինյանի կառավարությունը հասարակությանը շատ երկար կկարողանա համոզել, որ ինքը աշխատանք է տանում»,- «Առաջին լրատվական»-ի հետ զրույցում ասաց նա՝ շեշտելով, որ երբ լրանա կառավարության աշխատանքի հարյուր օրը, հասարակության էյֆորիկ վիճակն էլ անցած կլինի։
Համբարյանը միևնույն ժամանակ նշում է՝ Փաշինյանը ժառանգել է բացարձակ սնանկ պետություն. «Եվ այդ առումով նրան դժվար կլինի բավարարել հասարակության բոլոր շերտերի սպասումները»։
Քաղաքագետն անդրադառնալով այն հարցին՝ արդյոք առաջիկա ընտրություններում կլինի գաղափարական պայքար, ընդգծեց. «Ցավոք սրտի, Հայասատնում կուսակցաշինությունը կայացած չէ։ Եթե երբևիցե մեկը մտածում է, որ ժողովուրդը նստելու և կարդալու է ՔՊ-ի ծրագիրը՝ սխալվում է։ Մարդիկ ընտրելու են, ոչ թե ՔՊ-ի անդամներին, այլ կոնկրետ Նիկոլ Փաշինյանին։ Այդ կուսակցության ոչ մի անդամ խարիզմատիկ չէ, չունի այն հռետորական արվեստը, որ ունի Նիկոլ Փաշինյանը։ Մարդիկ գնալու են ընտրեն ոչ թե ԲՀԿ-ին, այլ Գագիկ Ծառուկյանին, ոչ թե «Սասնա ծռերին», այլ Ժիրայր Սեֆիլյանին։ Ցավով եմ նշում, բայց Հայաստանում կուսակցաշինությունը կայացած չէ, մարդիկ էլ չհասան այն մակարդակի, որ ըստ գաղափարի ու ծրագրի ընտրեն՝ գնում ու մարդկանց են ընտրում»,- ասաց Համբարյանը։
Ըստ նրա՝ հիմա ոչ մի քաղաքական ուժի ձեռնտու չէ քննադատել իշխանություններին.«Բոլոր քննադատությունները սվիններով են ընդունվում, ոչ ոք չի ուզի հասարակությանն իրենց դեմ տրամադրել»։
