Հարավային Կորեան չի բացառում Հյուսիսային Կորեայի կողմից սադրանքների հնարավորությունը, քանի որ հայտնի չէ, թե որ ուղղությամբ կշարժվի Փխենյանը Չան Սոն Տհեկի՝ Կիմ Չեն Ինի հորաքրոջ ամուսնու մահապատժից հետո: ITAR-TASS-ի փոխանցմամբ՝ այս մասին հայտարարել է Հարավային Կորեայի նախագահ Պակ Կին Հեն իր ավագ քարտուղարների հետ խորհրդակցության ժամանակ:
Սեուլում ներկայում մեծանում է անհանգստությունը՝ կապված այն բանի հետ, որ Հյուսիսային Կորեան, փորձելով ամրապնդել իր ներքին միասնությունը, կարող է մեծացնել լարվածությունը տարածաշրջանում:
«Հաշվի առնելով Հյուսիսային Կորեայում վերջին իրադարձությունները՝ մեզ դեռ հասկանալի չէ, թե ինչ զարգացում կունենա այդ երկրի շուրջ իրավիճակը: Մենք հիմա չենք կարող բացառել արտակարգ իրավիճակների առաջացման հավանականությունը՝ ներառյալ սադրանքները»,- ընդգծել է Հարավային Կորեայի նախագահը:
Նա բնակչությանը կոչ է արել պատրաստ լինել ամեն ինչի՝ «հաշվի առնելով Կորեական թերակղզում տիրող ներկայիս ծանր ու անկանխատեսելի իրավիճակը»:
