Ֆուտբոլի աշխարհի առաջնությունում այսօր գրանցվեց անակնկալ, որն այդպիսին է ոչ միայն այս, այլ` մունդիալների ողջ պատմության ընթացքում. Գերմանիայի հավաքականն առաջին անգամ չհաղթահարեց խմբային արգելքը:
Մշտապես իր կազմակերպված ու կայուն խաղով աչքի ընկնող հավաքականը բաց է թողել ընդամենը երկու` 1930 և 1950թթ-ի առաջնությունները: Գերմանացիները 18 անգամ հաղթահարել են խմբային արգելքը, չորսական անգամ նվաճել են ոսկե, արծաթե և բրոնզե մեդալներ:
Այսօր գերմանացիները դավաճանեցին իրենք իրենց, սակայն կրկնեցին աշխարհի երկու նախորդ առաջնությունների տխուր օրինաչափությունը, երբ գործող չեմպիոնները չեն հաղթահարում խմբային արգելքը:
Սակայն այսօր որևէ բան չէր հուշում, որ Գերմանիայի հավաքականը հակահերոս է դառնալու, համենայն դեպս` աշխարհի չեմպիոններին անհրաժեշտ էր ընդամենը նվազագույն հաշվով հաղթանակ Հարավային Կորեայի համեստ հավաքականի հանդեպ` փլեյ-օֆֆում հայտնվելու համար:
Սակայն դա տեղի չունեցավ. խաղի ավելացված ժամանակում գերմանացիները երկու անպատասխան գնդակ ընդունեցին սեփական դարպասը և խմբում զբաղեցրեցին վերջին տեղը:
F խմբում այսօր գրանցվեց մեկ այլ` ավելի փոքր մասշտաբի անակնկալ. Շվեդիայի հավաքականը 3:0 հաշվով ջախջախեց առաջատարին` Մեքսիկայի ընտրանուն և 1/8 եզրափակիչ դուրս եկավ առաջին համարով:
Շվեդիայի հավաքականը 1/8 եզրափակիչում ուժերը կչափի Շվեյցարիայի ընտրանու հետ, որն այսօր խմբային վերջին խաղում, հակառակ սպասումներին, ընդամենը մեկ միավոր վաստակեց Կոստա-Ռիկայի ընտրանու հետ խաղում:
E խմբում ընդգծված ֆավորիտը Բրազիլիայի հավաքականն է, որն այսօր որևէ շանս չթողեց սրբերին` վերջիններիս դարպասն ուղարկելով երկու անպատասխան գնդակ:
1/8 եզրափակչում հուլիսի 2-ին Բրազիլիայի հավաքականը մրցելու է Մեքսիկայի ընտրանու հետ: Սպասվում է գրավիչ հանդիպում, մնում է մեքսիկացիներն առաջիկա մի քանի օրերին կարողանան հաղթահարել այսօրվա դաժան պարտության շոկը:
