Արմավիրի մարզի Արշալույս գյուղի բնակիչները արդեն չորս օր է՝ փակել են գյուղի կենտրոնական փողոցը և պահանջում են գյուղապետ Զարզանդ Գրիգորյանի հրաժարականը: Արշալույսցիները մտադիր են ճանապարհը փակված պահել, մինչև գյուղապետը չկատարի իրենց պահանջը: Զարզանդ Գրիգորյանը Արշալույսի գյուղապետ է 2008 թվականից, վերջին անգամ վերընտրվել է 2015թ. դեկտեմբերի 6-ին, ստանալով 1066 ձայն, նրա միակ մրցակիցը ստացել էր 564 ձայն:
Զարզանդ Գրիգորյանի հրաժարականն են պահանջում անգամ նրանք, ովքեր երեք ընտրություն անընդմեջ քվեարկել են նրա օգտին: Գրիգորյանի հրաժարականի պահանջը նրանք հիմնավորում են երկրում տեղի ունեցած հեղափոխությամբ: «Երբ մեր գյուղի երիտասարդները փորձում էին հավաքվել գյուղի կենտրոնում և երթով գնալ դեպի Երևան՝ աջակցելու Նիկոլ Փաշինյանի հեղափոխությանը, Զարզանդ Գրիգորյանը սպառնում էր հաշվեհարդար տեսնել մեզ հետ: Երբ Հայաստանի բոլոր գյուղերում դասադուլներ էին կազմակերպվում, և դպրոցականները այդ ձևով միանում էին համաժողովրդական պայքարին, Զարզանդ Գրիգորյանը քաշքշում էր դպրոցական երեխաներին և անգամ աղջիկներին: Ամբողջ երկիը ազատվում է Հանրապետականի լծից, բոլոր քաղաքներում և գյուղերում հանրապետական քաղաքապետները և գյուղապետները հրաժարական են ներկայացնում, ինչու պետք է մեր գյուղը մնա ՀՀԿ-ի տիրապետության տակ»,- ասում են արշալույսցիները:
Արշալույսցիները ասում են, որ իրենք ուզում են ազատվել գյուղը բաժանող կլանային մտածելակերպից: Գյուղը բաժանել էին մանվելականների ու հրանտականների (խոսքը ԱԺ նախկին պատգամավոր Հրանտ Գրիգորյանի մասին է, որը Զարզանդ Գրիգորյանի եղբայրն է): Մարդկանց իրար դեմ էին հանել, ով գյուղապետին չի ընտրել, նրա թշնամին է, ով Մանվել Գրիգորյանի մոտ է աշխատում թշնամի է: «Մանվելի ու նրա եղբոր տղաների ժամանակը անցել է, մեր գյուղին պետք է նոր և երիտասարդ գյուղապետ, որը ոչ մի կլանից չի լինի, ով բոլոր գյուղացիներին կնայի հավասար աչքով, չեն լինի մանվելականներ ու հրանտականներ»,- ասում են բողոքողները:
Զարզանդ Գրիգորյանը իր հրաժարականը պահանջողների հետ չի հանդիպել: Ճանապարհ փակողներն ասում են, որ նա արդեն չորս ամիս է՝ արձակուրդում է, նույնիսկ գյուղում էլ չէ: Բայց գիտեին, որ նրա կողմնակիցները մտնում են մարդկանց տները և հայտարարում, որ հունիսի 26-ին էլ գյուղապետն է իր կողմնակիցների հանրահավաք կազմակերպում: Այս առիթով գյուղացիներից մեկն ասում է. «Այս գյուղում բոլորը իրար ազգական ու բարեկամ են, կա տուն, որտեղ հայրը գյուղապետի դեմ է, որդին պաշտպանում է գյուղապետին, կամ եղբայրներից մեկը դեմ է, մյուսը՝ կողմ, ինչ է՝ ուզում է եղբայրասպան կռիվ լինի, իր համար բարեկամը բարեկամին ծեծի»:
Մենք հանդիպեցին Արշալույսի գյուղապետ Զարզանդ Գրիգորյանին և նա չհերքեց, որ իր կողմնակիցները ևս ուզում են ի պաշտպանություն իր գյուղապետ մնալու հանրահավաք կազմակերպել: «Եթե բողոքողները 20-30 մարդ են կամ 50 հոգի, ապա վաղը ամենաքիչը 500 մարդ է հավաքվելու գյուղի կենտրոնում՝ ասելու իրենց խոսքը: Չի կարող այնպես լինել, որ մի քանի մարդու ուզելով ես հրաժարական ներկայացնեմ, որովհետև եթե այդպես լինի՝ ամեն օր կարող են գյուղապետ ազատել ու նշանակել»,- ասում է Գրիգորյանը, որը համոզված է, որ համագյուղացիների 70-80 տոկոսը իր կողմնակիցներն են: Երբ խոսում ենք հեղափոխության և դրա արդյունքները նաև Արշալույսում տրանսֆորմացնելու մասին, Գրիգորյանն ասում է, որ նոր իշխանությունը դեմ է սարքելուն, և եթե համայնքապետը ունի իր համաքաղաքացիների կամ համագյուղացիների իրական աջակցությունը, նոր իշխանությունը չի ստիպելու, որ նա հրաժարական տա: Ինքն էլ ապացուցելու է, որ իսկապես ունի գյուղացիների աջակցությունը:
Մենք առաջարկում ենք, որ Զարզանդ Գրիգորյանը հրաժարական ներկայացնի և մասնակցի արտահերթ ընտրություններին, և եթե նորից հաղթի, ապա կապացուցի, որ ունի համագյուղացիների աջակցությունը: Գրիգորյանն ասում է, որ համաձայն չէ այս մոտեցմանը, որովհետև եթե նորից հաղթի, ապա այդ նույն մարդիկ կարող են նորից պահանջել իր հրաժարականը: «Ես էլ ասում եմ, որ հերթական ընտրություններին մեկ տարի մի քանի ամիս է մնացել, ուզում եք ինձ հեռացնել, սպասեք մի տարի, ընտրություն կլինի, չեք ընտրի, ես չեմ լինի գյուղապետ»,- իր դիրքորոշումը պարզաբանում է Գրիգորյանը:
Սեփական կողմնակիցների հավաք կազմակերպելը այնքան էլ փայլուն գաղափար չի, մանավանդ որ կա իրական վտանգ, որ դա կարող տանել բախման նրա կողմնակիցների և հակառակորդների միջև, և այդ դեպքում գյուղապետի հրաժարականը կդառնա անխուսափելի, անկախ նրան աջակցողների քանակից:
