ՀՀ առողջապահության նախարարության գլխավոր արյունաբանի պաշտոնում Սմբատ Դաղբաշյանի փոխոխությունը մեծ իրարանցում է առաջացրել համակարգում։
Նշենք, որ երեկ պարզ դարձավ, որ Սմբատ Դաղբաշյանին գլխավոր արյունաբանի պաշտոնում փոխարինել է Սամվել Դանիելյանը: Դաղբաշյանը, սակայն, շարունակում է զբաղեցնել Յոլյանի անվան արյունաբանական կենտրոնի տնօրենի պաշտոնը։ Նշենք, որ Սմբատ Դաղբաշյանը ՀՀ ԱՆ գլխավոր արյունաբանն էր 2003 թվականից, սակայն նա մասնագիտությամբ արյունաբան չէր և չէր կարող զբաղեցնել այդ պաշտոնը։ Իսկ տարիներ շարունակ զբաղեցնում էր գլխավոր արյունաբանի պաշտոնը, քանի որ հանդիսանում էր ՀՀ երրորդ նախագահ Սերժ Սարգսյանի կնոջ՝ Ռիտա Սարգսյանի մտերիմը։
Հիմա ՀՀԿ-ական, ՀՀԿ խորհրդի անդամ Դաղբաշյանի հեռացումը մեծ իրարանցում է առաջադրել համակարգում։ Բժիշկների մի մասը պաշտպանում է նրան, մի մասը՝ արդարացնում նրա հեռացումը։ Երեկ անգամ «Հայ ուռուցքաբանների ասոցիացիա»-ի նախագահը և ՀՀ ԱՆ գլխավոր մանկական ուռուցքաբանը բաց նամակով դիմել էին առողջապահության նախարարին՝ խնդրելով մանրամասն զննել իրավիճակը և վերականգնել Դաղբաշյանին ՀՀ ԱՆ գլխավոր արյունաբանի պաշտոնում:
«Ես և իմ ընտանիքի անդամները առաջիններից ենք եղել, որ սատարել և ողջունել ենք մեր երկրում կատարված թավշյա հեղափոխությունը:
Սակայն այսօր ցավով փաստում եմ, որ որոշ ուժեր իրենց միջամտությամբ հարվածի տակ են դնում հեղափոխության նվաճումները և նորընտիր կառավարությանը:
Խոսքը գնում է որոշ կայքերում հրապարակված տեղեկության մասին, որ ՀՀ գլխավոր արյունաբան Ս. Դաղբաշյանը հեռացվել է պաշտոնից, իբր այն պատճառով, որ արյունաբան չէ»,- գրված է բաց նամակում։
Մանկական ուռուցքաբան, արյունաբան Գևորգ Թամամյանը, սակայն, «Առաջին լրատվական»-ի հետ զրույցում անհրաժեշտություն որակեց Դաղբաշյանի հեռացումը։ Նրա խոսքերով՝ ոչ մասնագետը, 1 տարվա ինտերնատուրա ավարտած թերապևտը 2003 թվականից ղեկավարում է ոլորտը որպես գլխավոր արյունաբան, ինչը չէր կարող անել։ «Գլխավոր արյունաբանի ֆունկցիաների մեջ մտնում է դժվար դեպքերը քննարկելը։ Ես, օրինակ, որպես արյունաբան, պետք է դժվար դեպքերի ժամանակ իր հետ քննարկեմ հարցը, բայց եթե նա մասնագետ չէ, ինչ պետք է քննարկեմ նրա հետ։ Եվ ինձ համար շատ զարմանալի է, որ արյունաբանները, բժիշկները հիմա աղմուկ են բարձրացրել։ Չնայած հասկանալի է՝ վախի մթնոլորտ կա, որոշ մարդիկ ունեն անձնական շահագրգռվածությունը։ Ցավում եմ, քանի որ շատ մարդիկ իմ ներկայումթյամբ բոլորովին այլ կերպ են արտահայտվել նրա մասին։ Այս դեպքը այլ կերպ չի կարելի ընկալել, քան որ տեղի է ունեցել արդարություն։ Մարդը, որ 2003 թվականից իր կուսակցական տոմսով, քավոր-սանիկական կապերով ուզուրպացրել էր ոլորտը, հեռացել է ոլորտի գլխավոր մասնագետի պաշտոնից, որը ես ողջունում եմ։ Սա ոլորտում նոր զարգացումների սկիզբ է»,- ասաց Թամամյանը։
Նրա խոսքերով՝ Դաղբաշյանին պաշտպանողների մոտ հարց չի՞ առաջանում, թե մարդը, որը մասնագետ չէ, ինչու է այսքան տարի գլխավոր արյունաբանի պաշտոնը զբաղեցնում։ Դա նույնն է, որ ինձ՝ մանկական ուռուցքաբանիս նշանակել գլխավոր գինեկոլոգ, կամ գլխավոր վիրաբույժ, որի հետ ես բացարձակ կապ չունեմ։ Բժիշկները առաջինը իրենք պետք է շահագրգռված լինեն, որ ոլորտը ղեկավարի մասնագետը։ Բժշկի համար առաջնահերթը պետք է դա լինի»,- ասաց մեր զրուցակից բժիշկը՝ հավելելով, որ տարիներ շարունակ բժիշկների մոտ դժգոհություն է եղել այս խնդրի հետ կապված, բժիշկներից մեկը՝ Դանիելյանը, անգամ 2007 թվականին լքել է կենտրոնը։ «Հասկանում եք, տարիներ շարունակ վախի մթնոլորտ է եղել, անձնական շահագրգռվածություն է եղել, տարիների ընթացքում կապեր են ձևավորվել, բայց մեկ է, եթե մասնագետը համարում է, որ իրեն պետք է ղեկավարի ոչ մասնագետը, ապա ես կխուսափեմ այդ մասնագետին գնահատական տալուց։ Բայց այլևս նոր իրողություններ են, որը ոմանք դեռ չեն ընկալում։ Կրկնում եմ, ոչ մասնագետին հեռացնելն ու մասնագետին նշանակելը արդարության վերականգնում է։ Տարիներ շարունակ մարդիկ, ովքեր թաղված են եղել կոռուպցիայի մեջ, պետք է հեռանան և դրա դիմաց կանգնելը անօգուտ զբաղմունք է»,- նշեց Թամամյանը՝ հավելելով, որ օրեր առաջ էջմիածինցիները, ի նշան Մանվել Գրիգորյանի, ԱԱԾ-ի դիմաց բողոքի ցույց էին անում, բայց ԱԱԾ-ի տեսանյութից հետո այդ մարդիկ անհետացան։ «Հիմա կուզեմ տեսնել այն մարդկանց դեմքերը, որոնք արյունաբանական կենտրոնում իրականացվող բացահայտումներից հետո կփորձեն պաշտպանել իրենց՝ արդեն նախկին ղեկավարին։ Նույն բժիշկները առանձին զրույցներում բարձրաձայնել են կոռուպցիայի մասին։ Ինձ բազմաթիվ անգամներ տարբեր մարդիկ պատմել են այնտեղ գործող կոռուպցիոն մեխանիզմների մասին։ Բացի կոռուպցիոն նման խնդիրներից, կան նաև այլ խնդիրներ։ Նրա կողմից, հիմնականում միջնորդավորված, վարչական լծակները օգտագործելու դեպքեր են եղել։ Իր էլեկտրոնային փոստից ուրիշի անունով այլ բուժհաստատությունների գործունեությունը խոչընդոտելու, փակելու փորձեր են եղել։ Շատերին է հայտնի, որ 2013 թվականին իր միջնորդությամբ և իր ջանքերով արգելվեց առաջին փոխպատվաստումը։ Իտալացիները եկել էին, պատրաստ էին դա անել, բայց արգելվեց, որպեսզի հետագայում, 4 տարի հետո ներարկիչը ձեռքին նկարվեր։ Իսկ այդ 4 տարվա ընթացքում կարելի էր լիքը կյանքեր փրկել։ Այս արարքին ոչ մի գնահատական չկա, արդարացում չկա»,-ընդգծեց Թամամյանը։
Ի դեպ, Գևորգ Թամամյանի խոսքերով՝ Ռիտա Սարգսյանի կողմից, քաղցկեղով հիվանդ երեխաներին, «Նվիրիր կյանք» հիմնադրամով աջակցության դադարեցումից հետո ոչ մի պատկեր չի փոխվել։ Երեկվանից վարչապետի տիկին Աննա Հակոբյանը լուրջ աջակցություն է ցուցաբերում ոլորտին։ Նա առաջնահերթ համախմբել է ոլորտի լուրջ մասնագետներին, հիմնադրամներին և փորձել խնդրին համակարգային լուծում տալ։ «Շուտով նոր հիմնադրամ կստեղծվի, որի հոգաբարձուների խորհրդի նախագահն է լինելու Աննա Հակոբյանը, որն ունի շատ լուրջ ծրագրեր մանկական ուռուցքաբանության, արյունաբանության ոլորտի զարգացման համար, որը տարիներ շարունակ այսօր արդեն հեռացված անձանց կողմից կասեցված էր»,- եզրափակեց Գևորգ Թամամյանը։
