Грузия Online-ի փոխանցմամբ՝ Վրաստանի խորհրդարանի խոսնակ Դավիթ Բաքրաձեն Al-Jazeera հեռուստաալիքին տված հարցազրույցում անդրադարձել է ռուս-վրացական հարաբերություններին.
«Չնայած օկուպացմանը՝ Վրաստանը մտադիր է երկարաժամկետ երկխոսություն սկսել Ռուսաստանի հետ։ Երբ երկիրը հասնում է կոնկրետ նպատակի, ապա միշտ մնում են ավելի մեծ չնվաճված բարձունքներ։ Մենք խոսում ենք մի երկրի (Վրաստան) մասին, որը կարողացել է հաջողությամբ վերակազմավորվել և, չնայած օկուպացիային ու ռուսական ագրեսիային, կարողացել է հասնել շատ բաների։
Մենք ձգտում ենք առավել հաջողակ լինել։ Ռուսաստանին հենց դա է զայրացնում, ինչի հետևանքով էլ նա Վրաստանում իրավիճակը ապակայունացնելու անընդհատ փորձեր է ձեռնարկում։ Սակայն չնայած դրան ու տարածքների 20 տոկոսի օկուպացիային՝ Վրաստանը, այնուամենայնիվ, պատրաստ է Ռուսաստանի հետ սկսել երկարաժամկետ երկխոսություն»։
Բաքրաձեն նաև հույս է հայտնել, որ այս դեպքում էլ պատմական տրամաբանությունը կմնա անփոփոխ և Մերձբալթյան երկրների նման Ռուսաստանն անպայմանորեն կլքի նաև Վրաստանը։
Հիշեցնենք, որ ռուսական կողմը հայտարարել է, թե հրաժարվում է Վրաստանի հետ երկխոսության մեջ մտնել այնքան ժամանակ, քանի դեռ Վրաստանում նախագահում է Միխեիլ Սաակաշվիլին։ Վերջինս այս կապակցությամբ ոչ վաղ անցյալում նշել էր, որ արդեն 3 տարի է, ինչ Ռուսաստանի նախագահ Դմիտրի Մեդվեդևի համար հանդիսանում է «քաղաքական դիակ»։
