Ադրբեջանում դատարանը դատավճիռ է կայացրել Իսմայիլի քաղաքում զանգվածային անկարգությունների կազմակերպիչների դեմ՝ հաղորդում է Interfax-ը:
Մեղադրյալներից մեկը՝ տեղի հյուրանոցի ադմինիստրատոր Էմիլ Շամսադդինովը, դատապարտվել է 9.5 տարվա ազատազրկման: Դատարանը նրան մեղավոր է ճանաչել մարմնական վնասվածքներ պատճառելու, խուլիգանության, ոստիկանությանը դիմադրելու մեջ:
Երկրորդ մեղադրյալը՝ Էլմադին Մամեդովը, մեղավոր է ճանաչվել խուլիգանության, իրավապահ մարմիններին դիմադրելու մեջ և դատապարտվել է երեք տարվա ազատազրկման: Երկու դատապարտյալներն էլ բողոքարկել են դատավճիռը:
Հետաքննության տվյալներով՝ հունվարի 23-ին Շամսադդինովը ոչ սթափ վիճակում վարել է մեքենա, որի հետևանքով բախվել է մեկ այլ մեքենայի: Վթարից հետո նա և Մամեդովը ծեծի են ենթարկել մյուս մեքենայի վարորդին: Սակայն տեղի բնակիչները պնդում են, որ անկարգությունների պատճառը աշխատանքի և սոցիալական ապահովման նախարար Ֆիզուլ Աքփերովի որդու հետ տեղի ունեցած միջադեպն էր, որն իր մեքենայով բախվել է մեկ այլ մեքենայի, այնուհետև վեճի է բռնվել վարորդի և տեղի բնակիչների հետ: Այս միջադեպից հետո քաղաքում սկսվել են զանգվածային անկարգություններ:
