Գործարար, բարերար Վահե Կարապետյանը, ով Երևան է ժամանել Լոս Անջելեսից, «Առաջին լրատվական»- ի հետ զրույցում նշեց, որ Հայաստանում ամիսներ առաջ հիմնադրել է «բազմաֆունկցիոնալ մեքենաների արտադրություն, որը հեռանկարային գործ է»: Գործարարը հավաստիացրեց, որ այս գործի հետ կապված՝ նախկին իշխանությունների օրոք դժվարություններ չի ունեցել:
Նա նաև հավելեց, որ օրերս հանդիպել է վարչապետի հետ. «Նիկոլ Փաշինյանը ոչ թե աթոռի անձ է, այլ գործունյա: Դա զգալի առավելություն է»:
Գործարարն ընդգծեց, որ հեղաշրջումից հետո սահմանային անցակետերում բավականին հեշտացել է մաքսազերծման գործընթացը:
Սփյուռքահայ գործարարը նկատեց՝ կապիտալը Հայաստան բերելու մեծ ռիսկը եղել է վստահության պակասը իշխանության նկատմամբ, իսկ այժմ այդ պատճառները վերացած են:
Գնահատելով Սփյուռքի և Հայաստանի հարաբերությունը՝ Կարապետյանը նշեց. «Գոյություն չունի, գործնականություն չկա, իրական գործնական Սփյուռքը քնած է, Սփյուռքը ժանգոտում է: Սփյուռքը սարսափելի հզոր է, բայց չենք կարողանում նրա ուժը հայրենիքի առաջադիմության համար օգտագործել: Ամեն հնարավորություն կա: Խնդիրը և՛ Հայաստանում է, և՛ Սփյուռքում:
Երբ ստեղծվեց Սփյուռքի նախարարությունը, ես հույսեր ունեի, որ այն պիտի լինի հայելին, որի մեջ Սփյուռքը և Հայաստանը կարող էին տեսնել միմյանց: Բայց դա չեղավ: Նոր Սփյուռք է պետք, ինչպես որ նոր Հայաստանը: Կուսակցական, միութենական, կրոնական խմբավորումներից վեր պետք է մեկ մարմին, միավորվածություն լինի, որին բոլորը մասնակից լինեն և հայրենիքը առաջադիմության հրեն:
Հարցին, թե սփյուռքահային պե՞տք է քաղաքական կյանքին մասնակից դարձնել, Կարապետյանը պատասխանեց, որ դրա հիմքերը դեռևս չեն դրվել:
Մանրամասն՝ տեսանյութում:
