Այսօր Հայաստանի «Արմենիա-Մարիոթ» հյուրանոցում անցկացվեց Սևծովյան տնտեսական համագործակցության նիստը: Վերջին կես տարվա ընթացքում Հայաստանը ՍԾՏՀ նախագահող երկիր է: Նիստին լրատվամիջոցները ներկա չեն եղել, սակայն ՍԾՏՀ անդամ պետությունների արտգործնախարարների խորհրդի 29-րդ նստաշրջանի շրջանակներում տեղի ունեցավ համատեղ մամուլի ասուլիս ՍԾՏՀ գլխավոր քարտուղարի, ՀՀ և Բուլղարիայի ԱԳ նախարարների մասնակցությամբ:
ՀՀ ԱԳ նախարար Էդվարդ Նալբանդյանը տեղեկացրեց, թե ինչ աշխատանքներ է իրականացրել՝ ՀՀ-ն վերջին կես տարվա ընթացքում ստանձնելով ՍԾՏՀ նախագահությունը: Նախարարը մասնավորապես տեղեկացրեց, որ վերջին վեց ամիսների ընթացքում կազմակերպվել են շուրջ 70 միջոցառում և մի քանի տասնյակ այլ նախաձեռնություններ՝ ուղղված կազմակերպության տնտեսական օրակարգին և կազմակերպության հանրային կապի ռազմավարության դրույթների կյանքի կոչմանը: Ապա, ըստ Նալբանդյանի, ընդունվել են զբոսաշրջության և կրթության ոլորտում հռչակագրեր, քայլեր են ձեռնարկվել արդիականացման, դիտորդների և ճյուղային երկխոսության համագործակցության զարգացման ուղղությամբ:
Էդվարդ Նալբանդյանն իր խոսքն ավարտեց՝ շնորհավորելով Բուլղարիայի ԱԳ նախարար Նիկոլայ Մլադենովին, քանի որ Բուլղարիան է լինելու կազմակերպության նախագահողը Հայաստանից հետո:
Ողջույնի և շնորհակալական խոսքով հանդես եկավ նաև Բուլղարիայի ԱԳ նախարար Նիկոլայ Մլադենովը՝ Հայաստանի նախագահությունը ՍԾՏՀ-ին բավականին հաջողված գնահատելով: Նա նշեց, որ իրենք մարտահրավերների առջև են, քանի որ Բուլղարիայի մարտահրավերն է շարունակել Հայաստանի սկսած լավ գաղափարները:
«Մենք կենտրոնանալու ենք մի քանի խնդրի վրա՝ վիզային ռեժին, երիտասարդություն, սպորտ, բնապահպանություն, առողջապահություն: Ապահովելու ենք կազմակերպության աշխատանքի թափանցիկությունը, ինչպես Հայաստանն է արել, մենք պետք է շարունակենք: Մենք կցանկանայինք նաև ԵՄ-ի միջև համատեղ ուժեղ կապ տեսնել, ընդլայնել համագործակցությունը ՄԱԿ-ի և այլ կազմակերպությունների հետ: Հիանալի ախատանք է արել պարոն Նալբանդյանը»,- նշեց նա:
ՍԾՏՀ գլխավոր քարտուղար Վիկտոր Ցվիրկունն շնորհակալություն հայտնեց նախագահող Հայաստանին լավ աշխատանքի համար: Նա Հայաստանի աշխատանքը, որպես նախագահող երկրի, գնահատեց որպես «տաք ու ջանասեր»: