Unicode-ում խնդրել են որպես ռուբլու նոր նշան չկիրառել հայկական այբուբենի 36-րդ ՝ «ք» տառը: Այս մասին ասվում է կոնսորցիումի տեղեկագրում՝ փոխանցում է Lenta.ru-ն:
Քննարկմանը, որը նվիրված է եղել ռուբլու նոր գրաֆիկական խորհրդանիշին, մասնակցել էր նաև Մայքլ Էվերսոնը, ով հանդիսանում է նոր նշաններ շրջանառության մեջ դնելու բազմաթիվ առաջարկների հեղինակ: Նա նշել է, որ արդեն աշխատում է այն բանի վրա, որպեսզի ռուբլու նոր նշանը ներառվի Unicode-ում:
Առաջին անգամ չի քննարկվում, որ անհրաժեշտ է Unicode-ում ներառել ռուբլու նոր նշանը, սակայն դրա համար խորհրդանիշը պետք է պաշտոնապես հաստատվեր:
Ռուսաստանի բանկը պաշտոնապես հաստատել է ռուսական արժույթի գրաֆիկական նշագրումը դեկտեմբերի 11-ին: Ռուբլու խորհրդանիշ է դարձել հորիզոնական գծիկով հատված «Р» տառը: Կենտրոնական բանկում ծրագրում են արդեն հաջորդ տարվա ընթացքում նոր նշանով մետաղադրամ հատել, ինչպես նաև այն կիրառել թղթադրամների վրա:
Մինչ նշանի հաստատումը մեկ ամսվա ընթացքում՝ նոյեմբերի 5-ից դեկտեմբերի 5-ը Կենտրոնական բանկի կայքում 5 տարբերակների բաց հասարակական քննարկում է անցկացվել: Մասնակցել է 280 հազար մարդ: Նրանց 61 տոկոսը կողմ է քվեարկել հաստատված տարբերակին:
