Երեկ՝ հունիսի 10-ին, ՏԻՄ հերթական ընտրություններ էին Արագածոտնի, Արարատի, Արմավիրի, Գեղարքունիքի, Լոռու և Կոտայքի մարզերի թվով 18 համայնքներում: Նշված համայնքներից 8-ում կայանալու են միայն համայնքի ղեկավարի, 6 համայնքում՝ միայն ավագանու անդամի, և 4 համայնքում միաժամանակ անցկացվելու են համայնքի ղեկավարի և ավագանու անդամի ընտրություններ: Այս մասին հայտնում է Կենտրոնական ընտրական հանձնաժողովը:
Ընտրության արդյունքները ամփոփելուց հետո որոշ համայնքներում գործող պատկերը փոխվել է։
Արագածոտնի մարզի 4 համայնքում՝ Անտառուտ, Դավթաշեն, Դպրեվանք և նոր Արթիկ, համայնքապետի ընտրություններ էին։ Անտառուտում վերընտրվել է ինքնաառաջադրված ՀՀԿ-ական համայնքապետը՝ Հովիկ Զաքարյանը։ Դավթաշեն համայնքում գործող համայնքապետը պարտվել է 23-ամյա երիտասարդ, անկուսակցական Գևորգ Հովհաննիսյանին։ Նոր Արթիկ համայնքում ՀՀԿ-ական գործող համայնքապետը՝ Թաթուլ Գրիգորյանը, պարտվել է ԲՀԿ-ական Վարդգես Ներսիսյանին։ Ընդ որում, նշենք, որ Թաթուլ Գրիգորյանն ու Վարդգես Ներսիսյանը քավոր-սանիկական հարաբերությունների մեջ են։
Արարատի մարզի Այգեզարդ համայնքում գործող անկուսակցական, բայց մինչ ՏԻՄ ընտրությունները ՀՀԿ-ական Արթուր Մանուկյանը պարտվել է անկուսակցական Ազատ Ավետիսյանին։
Ընդ որում, նշենք, որ այս համայնքում թեկնածու կար առաջադրված «Քաղաքացիական պայմանագիր» կուսակցությունից։ Առաջադրվել էր երիտասարդ Արամ Մանուկյանը, ով ընդամենը 25 ձայն է ստացել։
Արարատի մարզի Գոռավան համայնքում հաղթել է 15 տարի շարունակ համայնքի ղեկավար եղած Արսեն Բազիկյանը։ Նշենք, որ այս համայնքում ընտրությունները անցնում էին բավական լարված մթնոլորտում։ Առաջադրված ԲՀԿ-ական թեկնածու Վարդան Պետրոսյանը գործող համայնքապետին մեղադրում էր ընտրակաշառք բաժանելու մեջ, իր օգտին քվեարկելու համար գյուղացիների հարկերը, գույքահարկերն էր չեղյալ համարում, մարդկանց հիվանդանոցում բուժում ստանալու համար գումարներ փոխանցում։
Ի դեպ, երեկ, երբ մենք այս համայնքում էինք, դեռ 14։00-ի դրությամբ Բազիկյանը մեզ հետ զրույցում հայտարարեց, թե ընտրությունն արդեն ավարտվել է, և քիչ անց պարզ կլինի, թե ով է ընտրվել՝ իր ինքնավստահությունը բացատրելով «գյուղի համար արած ունենալով»։
Արմավիրի մարզի Մարգարա գյուղում թեկնածուները երկուսն էին՝ գործող համայնքապետ, ՀՀԿ-ական Խաչատուր Ասատրյանը և անկուսակցական, սակայն ԲՀԿ-ի աջակցությունը վայելող Էդգար Ենոքյանը: Նախնական տվյալներով՝ գործող համայնքապետը չի ընտրվել: Խաչատուր Ասատրյանի օգտին քվեարկել է 201 ընտրող, իսկ 30-ամյա Էդգար Ենոքյանի օգտին՝ 433: Վերջինս էլ ընտրվել է Մարգարայի համայնքապետ:
Գեղարքունիքի մարզի Վանեվան համայնքում անկուսակցական, բայց ԲՀԿ-ի կողմից առաջադրված թեկնածուն՝ Էմին Սարգսյանը, պարտվել է ինքնաառաջադրված գործող համայնքապետ Նորայր Հարությունյանին։
Լոռու մարզի Գեղասար համայնքում գործող անկուսակցական համայնքապետը պարտվել է ԲՀԿ-ի կողմից առաջադրված թեկնածուին։ Վերջինս՝ Վարազդատ Գևորգյանը, 206 ձայնով ընտրվել է համայնքապետ։
Կոտայքի մարզի Գետամեջ համայնքում էլ երկու ձայնի տարբերությամբ գործող անկուսակցական համայնքապետը՝ Ավետիս Մուրադյանը, հաղթել է ինքնաառաջադրված Զորայր Կարապետյանին։
Նշենք, որ սահմանված ժամկետում ընտրություններին որպես համայնքի ղեկավարի թեկնածու գրանցված 33 քաղաքացիներից 6-ը ներկայացրել էր ինքնաբացարկի դիմում: Համայնքի ղեկավարի ընտրությունների քվեարկությանը մասնակցող 27 թեկնածուներից 22-ը առաջադրվել էր ինքնաառաջադրմամբ, 4-ը` «Բարգավաճ Հայաստան» կուսակցության կողմից, և մեկ թեկնածու առաջադրել է Հայաստանի Հանրապետական կուսակցությունը:
Ավագանու անդամի գրանցված 89 թեկնածուներից ինքնաբացարկի դիմում էր ներկայացրել 10 թեկնածու: Ավագանու անդամի ընտրությունների քվեարկությանը մասնակցող 79 թեկնածուներից 76-ը առաջադրվել էր ինքնաառաջադրմամբ, 2-ը՝ Հայաստանի Հանրապետական կուսակցության կողմից, և մեկ թեկնածու առաջադրել էր «Բարգավաճ Հայաստան» կուսակցությունը:
Լուսանկարը՝ Photolure-ի