«Երբ քաղաքականությունն աշխատասենյակից դուրս է գալիս և տեղափոխվում է փողոց, ապա, ցավոք սրտի, դրանից Արցախի պայմաններում կան մեծ ռիսկեր, որ դա կարող է վատ հետևանքներ ունենալ, այդ իսկ պատճառով առաջին բանը, որ ես նախաձեռնեցի անել Արցախում այդ Հանրային խորհուրդ ստեղծելու գաղափարն էր, որպեսզի քննարկումները փողոցից տեղափոխվեն այլ հարթակ և փորձենք այդ ձևաչափով ապահովել իշխանություն-հասարակություն երկխոսությունը և հրատապ կարգով հասկանալ այն խնդիրները, որի շուրջ պետք է բանակցել»,- «Առաջին լրատվական»-ի հետ զրույցում ընդգծեց Արցախի Հանրապետության 5-րդ գումարման Ազգային Ժողովի պատգամավոր Սերգեյ Ղազարյանը՝ անդրադառնալով վերջին օրերին Արցախում տեղի ունեցած դեպքերին, Արցախի ԱԱԾ տնօրենի, ոստիկանապետի ու պետական նախարարի ներկայացրած հրաժարականներին ու արցախյան ներքաղաքական իրավիճակին։
Սերգեյ Ղազարյանի դիտարկմամբ՝ այն, ինչ տեղի է ունեցել Հայաստանում՝ (նկատի ունենալով թավշյա հեղափոխությունը-խմբագրական) իր մեջ պարունակում էր բազմաթիվ ռիսկեր՝ թե ներքին, թե արտաքին, հետևաբար չպետք է նույնը կրկնվեր նաև Արցախում՝ հաշվի առնելով Արցախի առանձնահատկությունը և արտաքին մարտահրավերների առումով՝ Արցախի ռիսկային լինելը։
«Արցախում ռիսկերը շատ են, այնտեղ առաջնագծից տասնյակ կիլոմետր հեռավորության վրա էին ցույցերն անցկացվում և իմ կարծիքով՝ ամենամեծ սխալն այն կլիներ, եթե որևէ մեկը փորձեր այստեղ ինչ-որ բաժանարար գծեր քաշել՝ ցուցարարների և հրաժարական տված այդ պաշտոնյաների միջև․ Արցախը շատ փոքր երկիր է և այնտեղ, եթե մենք հանկարծ փորձենք ինչ-որ մեկի խորհրդով շարժվել, ապա դա լավ բանի մեզ չի կարող բերել, բայց այդ փոփոխությունների անհրաժեշտությունը կար»,-հավելեց մեր զրուցակիցը։
Ըստ նրա՝ այս ամենից Արցախի իշխանությունները պետք է դասեր քաղեն, հետևություններ անեն և ներքաղաքական գործընթացների նկատմամբ վերանայեն իրենց մոտեցումները, ինչպես նաև այսուհետ ցանկացած խնդրի դեպքում փորձեն արագ արձագանքելու ռեժիմում աշխատել։
«Հիմա Արցախում կա այդ հանրային պահանջն իշխանությունների գործելաոճի փոփոխության հետ կապված՝ ավելի շիտակ, ավելի թափանցիկ ու հասանելի գործելու առումով․ պետք է այս դասերը քաղենք և միմյանց թև-թիկունք լինելով շարժվենք առաջ»,-նկատեց Սերգեյ Ղազարյանը։
Մանրամասները՝ տեսանյութում։
