Ֆուտբոլի Հայաստանի ազգային հավաքականի գլխավոր մարզիչ Վարդան Մինասյանը երեկ լրագրողների հետ հանդիպմանն ուշագրավ և դիպուկ հայտարարություն արեց: «Մեզ համար ամենակարևորը որակի և ցանկության համադրումն է: Միայն որակով կամ միայն ցանկությամբ հնարավոր չէ արդյունքի հասնել»,- ասաց Մինասյանը:
Մեր հավաքականի մարզիչն իրականում հստակ և ճիշտ սկզբունք է որդեգրել Ազգերի լիգայի խաղարկությունում հաջողության հասնելու համար: «Ազգերի լիգայի խաղարկությունում մենք ունենալու ենք 8 եզրափակիչ: Ունենալու ենք խմբային 6 հանդիպում, ինչպես նաև կիսաեզրափակիչն ու եզրափակիչը: Մեր նպատակն է հաղթել բոլոր այդ 8 եզրափակիչներում, քանզի նույնիսկ մեկ ոչ-ոքին կարող է լուրջ խնդիրներ առաջացնել»,- ասում էր Մինասյանը: Վերջինիս խոսքով՝ թեկուզ էպիզոդային, այնուամենայնիվ մեր հավաքականի ֆուտբոլիստների մեջ կա հաղթելու ցանկություն և ձգտում:
Հայաստանի հավաքականի ֆուտբոլիստների որակի մասին խոսելը, կարծում ենք, ավելորդ է: Այսօր ունենք Հենրիխ Մխիթարյան, որը դասվում է Անգլիայի Պրեմիեր լիգայի լավագույն կիսապաշտպանների շարքին, ունենք Գևորգ Ղազարյան, Մարկոս Պիզելի, Արաս Օզբիլիս, որոնք տարիներ շարունակ եղել են մեր հավաքականի շարժիչ ուժը, և ունենք մոտ երկու տասնյակ այլ ֆուտբոլիստներ, որոնք ցուցադրում են միջինից ցածր մակարդակի ֆուտբոլ: Ինչ խոսք, չմոռանանք նաև Յուրա Մովսիսյանին, որը իրական առաջատար է և հիմա մեր ազգային թիմին օդի և ջրի պես անհրաժեշտ է:
Մինասյանի կարծիքով՝ ֆուտբոլի Հայաստանի ազգային հավաքականի նորեկներից Անդրե Չալըշըրը և Իվան Յագանը պատրաստ են օգնել մեր ազգային թիմին, իսկ մյուս նորեկները դեռ ավելացնելու տեղ ունեն: «Կարող եմ ասել, որ Չալըշըրն ու Յագանը պատրաստ են խաղալ Հայաստանի ազգային հավաքականում: Ժոաո Ժորդի Մոնրա Արարատը և Էդգար Բաբայանը դեռ ավելացնելու տեղ ունեն, մանավանդ, որ երիտասարդ են: Այս ֆուտբոլիստներն ունեն մեծ պոտենցիալ, և հուսով եմ, որ նրանք որակական աճ կգրանցեն: Ինչ վերաբերում է Յուրա Մովսիսյանին, ապա նրա գալն ինձ համար շատ կարևոր էր: Այն շփումը, որ ես տեսնում էի նրա և խաղացողների միջև, այն մթնոլորտը, որ տիրում էր այդ երեք օրվա ընթացքում հավաքականում, ինձ շատ դրական լիցքեր հաղորդեցին: Յուրայի մոտիվացիան շատ բարձր է, նա շատ մեծ ցանկություն ունի հավաքականին տալ իր առավելագույնը»,- ավելացրեց Մինասյանը:
Իսկապես Չալըշըրը և Յագանը իրենց որակներով աչքի ընկան, ուստի կարող ենք ասել, որ ի դեմս այս խաղացողների՝ ունեցանք լուրջ համալրում: Չի կարելի ասել, որ այն որակը, որ ունենք այսօր, բանի պետք չէ և չի կարելի արդյունքներ ակնկալել: Այսօր ունենք բարձր մարզչական որակներ ունեցող մասնագետ, որը ամեն ինչ անում է ազգային թիմը ուշքի բերելու համար: Վստահ ենք՝ ձեռք տակ ունեցած ֆուտբոլիստներով Մինասյանին կհաջողվի ստանալ ընդհանուր այն որակը, որը կկարողանա պայքարել Մակեդոնիայի, Լիխտենշտեյնի կամ Ջիբրալթարի դեմ:
Այժմ փորձենք հասկանալ Մինասյանի կողմից հնչեցված մյուս կարևոր գործոնի՝ ցանկություն ասվածի մասին: Այն, որ Մինասյանը խոսում է ֆուտբոլիստների խաղալու ցանկության մասին, արդեն իսկ ցավալի մի իրողություն է: Կարծում ենք՝ ակնհայտ է, որ Մինասյանը նկատել է, որ ֆուտբոլիստների մեջ ցանկություն կամ ձգտում ուղղակի չկա: Իսկ ինչ է նշանակում ազգային թիմի խաղացողի մեջ ցանկության կամ ձգտման բացակայություն: Սա միանգամայն անընդունելի ու անհասկանալի, ինչ-որ տեղ նաև վտանգավոր մի երևույթ է: Ազգային հավաքականը մի հարթություն է, որտեղ հայտնվելը ցանկացած ֆուտբոլիստի համար պետք է լինի երազանք: Այսօր դժվար է ասել, թե Հայաստանի հավաքականի որ ֆուտբոլիստներն են, այսպես ասած, մատների արանքով վերաբերվում ազգային թիմին:
Եթե անկեղծ լինենք, ապա պետք է փաստենք, որ վերջին ժամանակաշրջանում ընդհանուր առմամբ մեր հավաքականի խաղում չէր նկատվում հաղթանակի քաղցը՝ տենչանքը: Մեր ֆուտբոլիստների շրջանում ձևավորվել է ճգնաժամային մի բարդույթ, որը Հայաստանի ֆուտբոլի ֆեդերացիայի և վերջինիս նախագահ Ռուբեն Հայրապետյանի վարած դեստրուկտիվ քաղաքականության հետևանք է: Ֆուտբոլիստները չեն կարողանում թոթափել այն նեգատիվ էմոցիաները, որոնք արմատացել են նրանց մեջ: Մինասյանը կամա թե ակամա բացահայտեց գաղջ մթնոլորտի առկայությունը, որն ուղղակի թույլ չի տալիս Հայաստանի հավաքականին հաղթել: Հրավիրելով Մովսիսյանին՝ Մինասյանը այդ մթնոլորտը կոտրելու քայլ արեց, բայց…
Ընդունենք, որ առկա իրավիճակում, քանի դեռ Ռուբեն Հայրապետյանը ուղղակի կապ ունի հայկական ֆուտբոլի և Հայաստանի հավաքականի հետ, այդ մթնոլորտը թոփափելը գործնականում անհնարին կլինի: Այո, Վարդան Մինասյանի որակ+ցանկություն բանաձևը կարող է հաղթանակ լինել մեզ և մեր հավաքականի համար: Հաղթանակ կարող է լինել մի պարագայում, այն է՝ գաղջ մթնոլորտի վերացումը, ինչը նշանակում է Ռուբեն Հայրապետյանի անհապաղ հրաժարական:
Վստահ ենք, որ Հայրապետյանի՝ հայկական ֆուտբոլից հեռանալու դեպքում մեր հավաքականում էապես կփոխվի մթնոլորտը, և ֆուտբոլիստների մեջ շատ արագ կարթնանան հաղթանակի քաղցն ու տենչանքը: Մինչև Ազգերի լիգայի խաղարկության մեկնարկը մնացել է 3 ամիս:
