Ռուսաստանի նախագահ Վլադիմիր Պուտինը Ավստրիայի կանցլեր Սեբաստյան Կուրցին խնդրել է այս ամառ Վիեննայում ԱՄՆ նախագահ Դոնալդ Թրամփի հետ երկկողմանի գագաթնաժողով կազմակերպել։ Այս մասին հաղորդում է The Wall Street Journal պարբերականը։ Պարբերականի աղբյուրի խոսքով՝ իր խնդրանքը Պուտինը հնչեցրել է հունիսի 5-ին Վիեննա պաշտոնական այցի ժամանակ։ Սեբաստյան Կուրցը խոստացել է հանդիպում կազմակերպելու նախաձեռնությամբ դիմել ԱՄՆ նախագահին։ Նա հավելել է, որ Սպիտակ տանն արդեն «քննարկում են այդ առաջարկությունը»։
Պարբերականը նշում է, որ Պուտինը չի ցանկանում, որպեսզի հանդիպումը Վաշինգտոնում տեղի ունենա և գագաթնաժողովի համար չեզոք վայր է նախընտրում։
Երկու երկրների հանդիպման նպատակը կարող է դառնալ «ՌԴ-ԱՄՆ հարաբերությունների կարգավորումը Սիրիայի, Ուկրաինայի և մի շարք այլ հարցերի շուրջ»։
Ակնկալվում է, որ Ավստրիայի կանցլերը Ռուսաստանի և ԱՄՆ նախագահների հանդիպումը կքննարկի Գերմանիայում ԱՄՆ դեսպան Ռիչարդ Գրենելի հետ, հունիսի 13-ին Բեռլին այցի ժամանակ։
