Այսօր՝ հունիսի 7-ին, Ազգային ժողովում հրավիրվել է արտահերթ նիստ՝ քննարկելու Կառավարության ծրագրին հավանություն տալու հարցը:
«Հիմա մեղադրանքները ուղղված են միջազգային կազմակերպությունների՞ն նաև, նրանք է՞լ են խեղաթյուրել»,- հարց ուղղեց ԱԺ Արփինե փոխխոսնակ Հովհաննիսյանը:
Նա իր ելույթում անդրադարձավ Ընտրական օրենսգրքում փոփոխություններին և արտահերթ խորհրդարանական ընտրություններ անցկացնելու թեմային:
«ՀՀԿ-ն պատրաստակամ է մասնակցել Ընտրական օրենսգրքի փոփոխություններին, դրանց աշխատանքներին, ավելին՝ պատրաստ ենք քննարկել ցանկացած թեմա: Չկա թեմա, որ պատրաստ չենք քննարկել: Միաժամանակ ողջամիտ ակնկալիք ունենք՝ ԸՕ ընդունումը պետք է լինի նույն ոճով ու ձևաչափով, որով ընդունվել է ներկա Ընտրական օրենսգիրքը: Կան ֆիքսված մոտեցումներ, որ Ընտրական օրենսգիրքն ընդունվել է ներառական, թափանցիկ, բոլոր քաղաքական ուժերի մասնակցությամբ, այն եղել է քաղաքական կոնսենսուսի արդյունք: Պահանջվող 63 քվեի փոխարեն այն ընդունվել է 102 կողմ ձայներով: Ավելին՝ դրան դեմ խոսողները որակվել են քաղաքական սեկտանտներ»,- նշեց Հովհաննիսյանը:
Արփինե Հովհաննիսյանը նկատեց, որ ճիշտ կլինի հավատարիմ մնալ այդ սկզբունքներին. «Հայաստանի ԸՕ-ի վերաբերյալ եղել է Վենետիկի հանձնաժողովի դրական կարծիքը: Ընդգծվել է, որ Ընտրական օրենսգիրքը պատշաճ հիմք է ժողովրդավարական ընտրություններ կազմակերպելու համար: Կարծում եմ՝ պետք է հավատարիմ մնանք այս սկզբունքին, դիմենք Վենետիկի հանձնաժողով, ստանանք նրանից դրական եզրակացություն և պատշաճ կերպով կազմակերպենք խորհրդարանական ընտրություններ: Անկախ նրանից, թե ինչ փաթեթավորմամբ հետ կկանգնենք այս օրենսգրքից, դա կլինի նահանջ ՀՀ-ի համար՝ իր ստանձնած պարտավորություններից»,-ընդգծեց Հովհաննիսյանը:
Նրա խոսքով՝ ինքը հասկանում է, որ ՀՀԿ-ն օբյեկտիվ պատճառներով քննադատության հարմար թիրախ է. «Քննադատելու ռեսուրսը, սակայն, սպառվելու միտում ունի: Կա նաև մեդալի հակառակ կողմը՝ աշխատանքը»:
Արփինե Հովհաննիսյանը վերջում եզրափակեց. «Բոլորս նույն նավի մեջ ենք՝ անկախ նրանից, թե ով է վերևում, ով՝ ներքևում»:
Մանրամասները՝ տեսանյութում:
