«Առաջին լրատվական»- ի զրուցակիցն է «Ելք» խմբակցության պատգամավոր Հովիկ Աղազարյանը:
-Այսօր Նիկոլ Փաշինյանի՝ վարչապետի պաշտոնը ստանձնելու 30-րդ օրն է, և այդ օրը Հանրապետականը զրկվեց բացարձակ մեծամասնությունից: Եվ մենք այսօր արդեն տեսնում ենք, որ գնալով ավելի են մարում վախերը՝ կապված հակահեղափոխության, ռևանշիզմի և բոլոր այն հնարավոր գործընթացների շուրջ, որոնք կարող էին հարված հասցնել հեղափոխությունը: Դուք ի՞նչ տպավրություն ունեք, և արդյո՞ք պահպանվում են վախեր, մտահոգություններ այդ առումով:
-Մտահոգություններ, մտավախություններ պահպանվում են, իհարկե, որովհետև անկախ նրանից, որ ՀՀԿ-ն զրկվեց իր բացարձակ մեծամասնության կարգավիճակից, ամեն դեպքում հակահեղափոխությունը դեռ զուգահեռ գնում է, հեղափոխության վերջնական ավարտը, ըստ մեր տրամաբանության, պետք է լինի արտահերթ ընտրություններ կազմակերպելը, հետևաբար հակահեղափոխությունը գործում է, դիրքավորվում է և փորձելու է արտահերթ ընտրությունների ժամանակ ռևանշի հասնել:
–Թե՞ ամեն ինչ անելու է, որպեսզի այդ ընրությունները չլինեն…
-Այնպես չէ, որ ամեն ինչ անելու են՝ արտահերթ ընտրություններ չլինեն, որովհետև դա դժվար կլինի իրենց համար, ուղղակի իրենք կարող են ամեն ինչ անել, որ երկարաձգեն այդ ժամանակը, քանի որ իրենց կարծիքով հեղափոխության ալիքը կարող է հասարակության մեջ նվազել, և իրենք կարող են ավելի բարձր արդյունքներ գրանցել:
-Հակահեղափոխություն կամ դիրքավորում ասելով՝ նկատի ունեք այն երկիշխանությանը վիճա՞կը, որում գտնվում է Հայաստանը կամ այն մարմինների՞ն, որոնք չեն ենթարկվում վարչապետին և նրա կողմից չեն նշանակված, թե՞ այլ գործընթացներ ևս:
-Ես նկատի ունեմ նաև այլ, ստվերային գործընթացներ. Հայաստանում այդ իմաստով բավականին լուրջ իրավիճակ է. շուկայի խոշոր խաղացողները՝ նկատի ունեմ տնտեսական, ֆինանսկան և այլն, դժվարությամբ կհաշտվեն այս իրավիճակի հետ և նրանք կանեն առավելագույնը, որ վերադառնան նախկին վիճակին:
Հարցազրույցն ամբողջությամբ՝ տեսանյութում: