ԱԺ «Ելք» դաշինքի պատգամավոր Էդմոն Մարուքյանը, ով այս օրերին մեկնել է Փարիզ՝ մասնակցելու ԵԽԽՎ հանձնաժողովի երկու նիստերին, տեսակապով «Առաջին լրատվական»-ի հետ զրույցում անդրադարձավ ներհայաստանյան մի շարք հարցերի և Արցախում ստեղծված իրավիճակին:
Անդրադառնալով Մասիսի քաղաքապետի և նրան սատարող 5 անձանց ազատ արձակմանը, որպես փաստաբան, Է. Մարուքյանը հայտնեց իր կարծիքը. «Ես չեմ փորձի մեկնաբանության առարկա դարձնել դատարանի որոշումը, որովհետև մենք երկար ժամանակ քննադատել ենք կալանքը որպես խափանման միջոց կիրառելը, և հիմա այլընտրանքային միջոց է օգտագործվել, բայց միևնույն ժամանակ պահանջ կար, որ նրանք կալանավորվեին: Այս քննադատությունը կարևոր ուղերձ է դատական իշխանությանը, չկա որևէ իշխանություն, որ կարողանա աչքերն ու ականջները փակ լսի հանրությանը: Կոնկրետ այս դեպքում մտահոգություն կա, հնարավոր է, որ նրանք, ազատ արձակվելով, ազդեն վկաների, նրանց ցուցմունքների վրա»:
Անդրադառնալով հարցին՝ քաղաքական ենթատեքստ տեսնո՞ւմ է այս գործընթացում՝ հաշվի առնելով, որ նրանց ազատ արձակման ժամանակ Արդարադատության նախկին նախարար Դավիթ Հարությունյանը դատական նիստերի շենքում էր, և կասկածներ կան, որ ճնշում է եղել դատավորի և ողջ գործընթացի վրա, պատգամավորը մեկնաբանեց. «Բնականաբար քաղաքական հնչեղություն ունի այս գործը, քաղաքական գործընթացների հետևանքով է այս գործը հարուցվել և քաղաքական պրոցեսների արդյունքնում է, որ ունենք հնարավորություն այս գործին ընթացք տալու, իսկ եթե հեղափոխություն չլիներ, այդ անձինք չէին կալանավորվի: Քաղաքական գործընթացի արդյունք է, որ իրավապահ մարմիններն այդքան հեռուն են գնացել, բայց միևնույն ժամանակ չպետք է անմեղության վարկածի սկզբունքը հաշվի չառնենք: Դ. Հարությունյանի մասնակցությունը ես չէի դիտարկի որպես ճնշում դատարանի վրա, որովհետև նա այս պահին որևէ պաշտոն չունի, ուղղակի ՀՀԿ անդամ է: Բայց պատգամավորները ստորագրություններ են տվել և երաշխավորել են այս անձանց ազատության համար… Եթե դատարանը հաշվի է առել այս ստորագրությունները, ապա եթե այս անձինք խախտեն օրենքը, ստորագրություն տվողները պատասխանատվություն են կրելու դրա համար: Այստեղ մենք օրենքի հետ խնդիր չունենք: Տեսնենք՝ Գլխավոր դատախազությունը կբողոքարկի դատարանի որոշումը, թե ոչ, եթե բողոքարկի, կլինի վերաքննություն:
Մի բան ակնհայտ է. թե՛ Փաշինյանը, թե՛ Արդարադատության նախարարը, թե՛ մենք բազմիցս նշել ենք, որ չենք միջամտելու դատական իշխանության գործերին: Դա առաջին նախապայմանն է և երաշխիքն է, որպեսզի դատական իշխանությունն առողջանա«,- նշեց Էդմոն Մարուքյանն՝ ընդգծելով, որ այս «քաոսից»՝ որոշ դատավորներ կարող են օգտվել:
Մանրամասն՝ տեսանյութում:
