Դալայ-լաման չի մասնակցի դեկտեմբերի 5-ին կյանքից հեռացած ՀԱՀ նախկին նախագահ Նելսոն Մանդելայի հոգեհանգստին: Այս մասին հայտնում է Associated Press-ը՝ հղում կատարելով տիբեթցիների հոգևոր առաջնորդի ներկայացուցչին:
Դալայ-լամայի մամլո քարտուղարը բացատրել է, որ նրա այցն անհնարին է «լոգիստիկայի» տեսանկյունից: Նա չի մեկնաբանել, թե ինչ ի նկատի ունի:
Վերջին անգամ Դալայ-լաման ՀԱՀ-ում է եղել 1996 թվականին՝ հանդիպելու Նելսոն Մանդելայի հետ, երբ վերջինս ընտրվել էր Հարավաֆրիկյան Հանրապետության առաջին սևամորթ նախագահ: Այնուհետև նա այլևս չի կարողացել ՀԱՀ ուղևորվել, քանի որ նրան մերժել են այցագրի տրամադրման հարցում: 2009-ին նա ցանկացել է այցելել այնտեղ անցկացվող Խաղաղության Նոբելյան մրցանակակիրների համաժողովին, սակայն իշխանություններն այցագրի մերժումը պատճառաբանել են, թե նա կշեղի ուշադրությունը 2010-ի ֆուտբոլի աշխարհի առաջնության նախապատրաստություններից:
2011-ին նա կրկին ծրագրել էր ՀԱՀ այցելել՝ Նոբելյան մրցանակակիր, Քեյփթաունի արքեպիսկոպոս Դեսմոնդ Տուտուի 80-ամյակին, սակայն Դելիում ՀԱՀ-ի դիվանագիտական ներկայացուցչությունն այնքան էր ձգձգել գործընթացը, որ հոգևոր առաջնորդը հետ էր կանչել դիմումը: ՀԱՀ-ի դատարանը խոստովանել է, որ դիվանագետների վրա ճնշում էին գործադրել Չինաստանի իշխանությունները: Չինաստանը հանդիսանում է երկրի խոշոր առևտրային գործընկերը:
