Նոր կառավարության ծրագիրը հաստատվել է կառավարության այսօրվա նիստում: Թեմայի շուրջ «Առաջին լրատվական»- ի հետ զրույցում քաղաքական մեկնաբան Հակոբ Բադալյանը նշեց. «Ծրագրում առաջնային արձանագրվել է արտահերթ ընտրությունների անցկացման անհրաժեշտությունը՝ նաև բովանդակային իմաստով, այսինքն՝ անհրաժեշտ փոփոխություններն իրականացնելու ճանապարհով և նաև ժամկետային առումով, որ առավելագույնը մեկ տարվա ընթացքում պետք է իրականացվի:
Այդ արձանագրումը կարևոր եմ համարում ոչ միայն իրավիճակը հեղափոխականից ամբողջապես ինստիտուցիոնալ քաղաքական համակարգային տիրույթ տեղափոխելու առումով, այլ նաև այդ կետը հենց արդեն ինքնին թելադրելու է կառավարության մոտիվացիան, գործողությունների տրամաբանությունը, որովհետև եթե մեկ տարի հետո պետք է լինի ընտրություն, կառավարությունն ամեն ինչ պետք է անի, որ կարողանա հավակնել 50+1 ցուցանիշին: Առաջնային ուղենիշը պետք է լինի հենց այդ ընտրության մարտահրավերը»:
Քաղաքագետ Ստյոպա Սֆարյանը նշեց, որ այս խորհրդարանն ունի հաստատված բյուջե, և նոր կառավարությունը կգնա բյուջեի վերանայումների. «Դրա մասին ակնարկներ կան, անշուշտ, վերաձևումներ կլինեն, բայց քանի որ եկամտային մասը հաշվարկված է, չգիտեմ, թե վերանայումների, կրճատումների ու խնայողությունների արդյունքում ինչպիսի փոփոխություններ կլինեն. շատ փոփոխություններ սպասելն իրատեսական չէ: Նաև հաշվի առնենք, որ այս կառավարությունը անցումային է, կոալիցիոն է, հետևաբար այս ծրագիրը չենք համարի գաղափարական կամ պլատֆորմային ծրագիր:
Այս ծրագիրը մեկ գլխավոր առաքելություն ունի ոչ միայն հռչակված տեսլականի առումով, որ իշխանությունը պետք է վերադարձվի ժողովրդին, իսկ դա տեղի է ունենում միայն ընտրությունների միջոցով; Բավարար չէ բանավոր հայտարարել, թե ժողովուրդն է նոր կառավարության հենարանը, փողոցով երկար կառավարել հնարավոր չէ, 50+1- ի և քաղաքական կայունության առումով, անշուշտ պետք է արտահերթ ընտրություններ տեղի ունենան»:
Հակոբ Բադալյանի դիտարկմամբ՝ գլխավոր պատասխանատվությունը թավշյա հեղափոխության առաջնորդող թիմի վրա է, և ընտրությունն այս թիմի համար պետք է դիտարկվի որպես հեղափոխության մի մաս:
«Այսօր քաղաքական կեցվածքի խնդիր կա, դեռևս գտնվում ենք քաղաքական ճգնաժամի մեջ»- նշեց Ստյոպա Սաֆարյանը և հավելեց, որ Ն. Փաշինյանն այս պահին արտախորհրդարանական ուժերի աջակցության կարիքն ունի:
Հակոբ Բադալյանը կարծիք հայտնեց, որ սպառված քաղաքական ուժերը պետք է հեռանան: Ս. Սաֆարյանը հավելեց, որ միասնական ցուցակով գնալը կնշանակի հեղափոխության առևանգում:
Մանրամասն՝ տեսանյութում:
